Квалитетни векторски РФ-анализа­тори од познатите брендови како што се Rohde & Schwarz, HP, Keysight, Anritsu, Agilent и слични, чинеа вистинско богатство. Од неколку илјади па до неколку стотици илјади евра. Во последно време, лека-полека и еден по еден, се појавија неколку евтини векторски РФ-анализатори со различни мож­ности, за цена од само илјада евра, па дури и помалку. Сите тие „евтини" векторски РФ-анализатори се обидуваа помалку или повеќе да ги достигнат некои од можностите на нивните многу поскапи братучеди, и претставуваа вистинско освежу­вање на пазарот на овие ексклузивни корисни радиотехнички мерни инструменти, кои сега станаа достапни и за „поширо­ките народни маси" :).

NanoVNA - Измерена карактеристика на жичена дипол антена за 3,6 MHz

Изминатата година вистинска револуција на пазарот направи појавата на еден мал џебен, ама многу моќен вистин­ски векторски РФ-анализатор со интересно име „NanoVNA”. Ова малечко чудо, и покрај својата фантастично евтина цена (јас го набавив за само 42 евра), има екран во боја кој се командува со допир. Освен тоа, NanoVNA е многу практичен за работа на терен поради своите мали димензии, а исто­времено е зачудувачки точен и прецизен.