Според анкетите, глобално околу 6% од луѓето веруваат дека астронаутите од мисијата Аполо воопшто не се спуштиле на Месечината. Не можам да се изначудам на нивните “аргументи” кои се полни со измислици, погрешни толкувања и нелогични заклучоци! Вџашувачки е зошто тие луѓе, кога веќе се интересираат за таа тема, воопшто не сакаат да фрлат ни еден поглед на написите или видеата што од научна-популарна страна ги обработуваат тие случки. Барем од љубопитност! Тие не се ни обидуваат да ги прочитаат аргументите од “другата страна” (научно-популарните списанија и интернет-портали), затворајќи се самодоволно во некој свој имагинарен свет на светски заговори. Интересно е тоа што тоа се луѓе кои не знаат ништо од историјата на развојот на астронаутиката, кои никогаш не купиле некоја книга за астронаутика, никогаш не биле претплатени на некое научно-популарно списание за астрономија и астронаутика, кои никогаш не погледнале низ телескоп (а не дај Боже да купат телескоп!)... Тогаш, врз основа на што тие луѓе го засноваат тоа свое погрешно мислење? Се разбира, врз основа на бројните интернет-портали посветени на таканаречени мистерии (духови, НЛО, Рамна Земја, масони, Илуминати, Ротшилдови...) и кратките YouTube клипчиња, дела на анонимни имбецили или манипулатори. 

Нејасно ми е дали нивните квази аргументи и теории се резултат на глупавост, незнаење или на некоја нивна скриена агенда (веројатно има од сè по нешто). Повеќето нивни “аргументи” можат лесно да се соборат само со знаење од “општа култура”, па зачудувачки ми е како таа теорија на заговор ја прифаќаат и некои луѓе со завршено средно и високо образование. Потребна е посериозна анализа на причините за ова, но одговорите се некаде помеѓу недоволните знаења од науката (пред сè од физиката, астрономијата и астронаутиката), немањето време и воља да се најдат и прочитаат научните информации, некои психолошки фактори и општата недоверба во државните системи. Се надевам дека овој опширен напис ќе помогне во “растерувањето на маглата” околу мисијата Аполо.