Сведоци сме на сè поголемата пропаганда за карактеристики на автомобили од кои “боли глава”. Целосно опремени со естетски изглед кој плени на прв поглед, со карактеристики на моторот почнувајќи од минимални 100 коњски сили, со алуминиумски 16 или 17-инчни фелни и широчина на гуми 205. Сите овие работи за само десет до тринаесет илјади евра со поволен лизинг или кредит. Секој од нас гледајќи ги рекламите по телевизиските канали ќе искоментира: “Леле, сега се купува автомобил, види колку се евтини”. Дали е тоа така, во овој текст ќе се обидеме да појасниме, т.е. ќе појасниме некои карактеристики на возилата кои се клучни за возните перформанси и за уживање во возењето. Вакви објаснувања за перформансите на возилото би требало да добиете во автосалоните, но кај нас редовно изостанува, па купувањето ново возило се сведува на избор на марка на возило, боја на возилото и неговата опременост. Овој текст е подеднакво корисен како за купувачите на ново возило, така и за купувачите на стари возила. Со разбирање на карактеристиките на возилото кое го купувате, ќе ви биде многу појасно за што ќе ги дадете вашите пари и какви возни перформанси ќе добиете за вашите пари.