Астрономите од Институтот за технологија во Пасадена, Калифорнија, околу ѕвездата Вега откриле два астероидни појаса, меѓусебно разделени со празнина. Во откривањето на појасите тие користеле податоци добиени од орбиталниот телескоп на НАСА (NASA), Спицер (Spitzer) и од орбиталната опсерваторија на ЕСА (ESA), Хершел (Herschel). Слично како во Сончевиот систем (!), едниот појас се наоѓа близу до матичната ѕвезда, па поради тоа е наречен топол астероиден појас, а другиот е далеку од ѕвездата, на самиот раб на системот, па е наречен студен појас. Појасите се раздвоени меѓу себе со голема празнина, така што целата архитектура кореспондира на архитектурата во нашиот Сончев систем со исто така два астероидни појаса – едниот топол – помеѓу планетите Марс и Јупитер, а другиот студен, т.н. Кајперов појас – на самиот раб на Сончевиот систем!