Најголемиот број на аудиоизвори (радиоприемници, CD плеери, касетофони...) во тек на својата репродукција на музички материјали не надминуваат динамички дијапазон (dynamic range) на звукот од 60dB. Овој податок го одреди бројот на потребните лед диоди за светлосна индикација на моќноста која ќе се мери. Рационалното отчитување од по 3 dB на секоја од одделните лед диоди и целниот дијапазон од 60 dB го одредија точниот број, VU метар со 20 лед диоди. Ако уредот се вгради во убава кутија или дизајнирана акрилна рамка за фотографија, а ако на тоа се додаде и селектор за избор на дијапазонот на моќноста која се мери, ќе се добие прегледен, точен и убав лабораториски инструмент во вашата мини-лабораторија за електроника.

Се потсетив на насловната страница на Емитер бр. 7-8 од 1996 год. кога беше објавен командниот пулт од мојата лабораторија за електроника, каде што во десниот агол на пултот, во делот за AUDIO TEST, се гледа вграден VU метар со десет лед диоди. Носталгично сакав да приложам линк до тој број, но веб-страницата на моето омилено списание е сè уште во изградба (не се внесени броевите од 1996 г.) и затоа приложувам алтернативен линк http://tehnikservice.net/blog/wp-content/uploads/2010/12/DSC_4745-1278-x... , каде што можете да го погледате вградениот VU метар со 10 лед диоди.

Не знам дали се сеќавате на времето кога немаше интегрирани кола, па макотрпно се обидувавме да направиме VU метар со серија од транзистори, по еден за секоја лед диода за индикација, по еден транзистор како извор на константна струја и делител на напон. Замислете сега да требаше да подготвите ППК со над 20 транзистори, 60 отпорници и 20 лед диоди. За среќа, сега имаме интегрирани кола. LM3915 е "лек на избор".