Покрај познавање на теоријата и практиката од разни области на електрониката секој електроничар треба да има и добри познавања на мерната опрема и мерните постапки. Меѓутоа голем дел од електроничарите, дури и некои од понапредните, не ја познаваат доволно оваа проблематика. Посебно големи проблеми на ова поле имаат почетниците што и самите го истакнуваат во своите обраќања до Редакцијата. Затоа одлучивме, во неколку продолженија, да дадеме еден краток преглед на мерната опрема и мерните постапки што се применуваат во електрониката. Со оглед на ограничениот простор и со оглед на тоа што ова се први написи на оваа тема во ЕМИТЕР, во оваа серија написи ќе се задржиме само на најосновните работи што треба да ги знае еден електроничар за мерењата и мерната опрема во електрониката.
Во овој број ќе се запознаеме со основната теорија за мерењата - што е мерење, какви грешки може да настанат при мерењето и како се претставуваат измерените величини. Во следните броеви ќе биде даден краток опис на најчесто користените инструменти во електрониката (унимер, електронски волтметар, осцилоскоп, тон генегатор, извор на напон ...), како и нивната примена при разни испитувања во електрониката.