Процесот на создавање на CD-то, колку и да звучи чудно, ни до денешен ден не е стандардизиран и не дава секогаш задоволителни, а камо ли врвни резултати. Бројните компоненти во ланецот на создавање на компакт дискот, секоја на свој начин и секоја за себе, делуваат и влијаат на конечниот квалитет на звукот, кој ние, крајните корисници, ќе го слушнеме со посредство на нашите домашни аудио уреди. Затоа е сосема јасно дека е неопходно да се посвети максимално внимание на секој посебен чекор во процесот на создавање на CD-то, ако се сака тоа врвно да звучи. И тоа денес им е познато на сите кои се занимаваат со таа работа. Меѓутоа, судејќи по прилично бројните и различни патеки на движење кон крајната цел, изгледа дека или на сите не им е јасно како се стигнува до целта или има повеќе сигурни патишта. Еден од најновите и моментално многу in е оној кој го разви искусниот продуцент Akira Taguchi и по кој за сега многу сигурно и суверено чекорат тој и стручњаците на JVC, следени од бучното одобрување на стручњаците и публиката. Наречен е XRCD или Extended resolution CD (CD со проширена резолуција).