Од почетоците на дигиталниот век, луѓето пишувале електронски книги кои првично биле од стручен карактер и наменети за одредена група на луѓе, т.е. компјутерските техничари. Е-книгите претставуваат медиум за пренос на информации кој е направен во дигитална форма и може да се обработува и прегледува на дигитален уред, т.е. персонален компјутер. Наједноставно кажано, електронските книги претставуваат фајл на вашиот компјутер кој содржи некоја пишана литература што може да се чита и да се разгледува исто како и книга печатена на хартија.
Електронските читачи или популарно наречени е-читачи претставуваат хардверски уреди кои во себе имаат можност за приказ и прелистување на е-книги. Е-читачите се специјализиран хардвер и се наменети за специфична работа, поради ова тие најчесто изгледаат како лист хартија, со монохроматски екран (кој најчесто е чувствителен на допир), неколку контроли и без никакви други додатоци. Производителите на поновите модели на е-читачи често вградуваат и можност за интернет поврзување преку бежична локална мрежа, како и вграден речник на зборови.
Поради специјализираниот хардвер чија намена е точно одредена, е-читачите најчесто имаат многу мала тежина, голем екран за прегледување на дигиталните содржини, добро заднинско осветлување како и голем работен век на батеријата. Лошата страна на овие уреди е нивната висока цена, како и достапноста на истите.