Анализата покажува дека ризикот од смртност би се намалил за приближно 2% за секоја година од завршено редовно образование. Ова значи дека оние кои го завршуваат целиот циклус на основно и средно образование (12 години поминати на училиште) бележат намалување на ризикот од смртност за најмногу 26%, додека за оние кои завршуваат и универзитетски студии (континуирано учење во текот на 18 години) намалувањето на смртноста расте на најмногу 34%, споредено со оние кои немаат никакво образование. Овие придобивки, иако се поголеми кај помладите, може да се најдат и кај оние кои се постари од педесет години.

Од друга страна за оние кои не посетувале ниту една година училиште, негативните ефекти врз здравјето се еднакви како и консумирање на пет или повеќе алкохолни пијалоци дневно или пушење на десет цигари дневно во текот на десет години.

Врската помеѓу образованието и очекуваниот животен век веќе беше позната, но оваа студија е прва што конкретно ја разработува низ бројки. Новите податоци нѐ потсетуваат на важноста од инвестирање во образованието со цел намалување на ризикот од смртност, дури и во најсиромашните земји.

Како што објаснува и Дејвид Финч, директор на добротворната организација The Health Foundation, оние кои се образовани имаат подобри социјални врски, подобро ги разбираат информациите и затоа се способни да направат подобар избор. Со други зборови, образованието ни дава алатки за да живееме подобро. И, последно, но не и најмалку важно, образованието ни овозможува да заработиме повеќе и да имаме подобар пристап до здравствената заштита, особено во земји (како САД) каде здравството не е јавно, и каде полниот паричник може да направи вистинска разлика кога ќе дојде време за лекување.

Иако податоци од нашиот регион не биле користени во истражувањето, секако дека заклучоците сосема извесно важат и за нас.