На настанот беа презентирани краткорочните и долгорочните цели на здружението како и неговата структура, од страна на претседателот на здружението г. Горан Шутиновски. Со поздравен говор пред присутните се обрати и в.д. амбасадорот на Македонија во Полска, г. Илија Псалтиров.

Лево: Oбраќање на в.д. амбасадорот на Македонија во Полска, г-динот Илија Псалтиров; Десно: Дел од изложените македонски орнаменти

Програмата продолжи со проекција на два краткометражни филма – „Долу од рајот“, во режија на Саша Станишиќ, и „Ќе му се јавам на татко ти“, во режија на Леонид Ристов. Ансамблот за песни и танци при Економскиот универзитет во Варшава, настапи со изведба во живо на неколку полски народни песни, а посебно за оваа пригода, и на големо воодушевување на присутните, ансамблот ја отпеа во  македонски јазик и македонската песна „Македонско девојче“, оригинално напишана и компонирана од македонската музичка легенда Јонче Христовски.

Дел од изложените фотографии на Даниел Анастасов, со мотиви од Скопје и од Варшава

Во изложбениот простор на културниот центар имаше и поставка на авторски урбани фотографии од Скопје и Варшава на г. Даниел Анастасов, потпретседател на Здружението, а беа изложени и македонски орнаменти од приватните колекции на некои од членовите на здружението. Изложено беше и достапно за продажба двотомното издание „Македонија – Јозеф Обрембски“ во редакција на Ана Ангелкин, Јоана Рексас и Илија Упалевски од Институтот за етнологија во Варшава.

Презентација и продажба на книгата 'Македонија според Ј. Обрембски'

Заедничка фотографија на дел од присутните гости со членовите на Ансамблот за песни и танци при Економскиот универзитет во Варшава

Следуваше неформалниот дел во бифето на културниот центар каде што присутните имаа прилика да дегустираат вкусна македонска храна како и вината од винаријата Далвина.

Голем дел од гостите на настанот изразија интерес да се приклучат и зачленат во здружението и веруваме на градење на солидно членство во месеците што следуваат.

Неформално дружење на крајот од настанот

За Здружението
Здружението за промоција на македонска култура во Полска е непрофитна невладина организација, чија примарна мисија е да ги обедини Македонците кои живеат во Полска, да гради пријателски полско-македонски односи, да ја промовира македонската култура, уметност, јазик и да ги доближи до сите оние кои сакаат да ја запознаат Македонија.

ЦЕЛИ за кои се залага Здружението:
1. Промоција и поддршка на македонската култура, јазик, образование, наука, историја, уметност, традиции, музика и обичаи.
2. Градење пријателски полско-македонски односи и негување контакти и соработка во услови на мултикултурно и разновидно општество.
3. Обезбедување информативна помош и поддршка на Македонците во Полска.
4. Соработка и реализација на заеднички проекти со Македонци и Полјаци во Полска и во странство, како и поддржувачи и пријатели на широко ценетата македонска култура.

--- промотивна објава ---