Револуционерната „био-закрпа“ може да се вметне во човечкото тело со минимално инвазивна хируршка процедура со употреба на робот-хирург.

Закрпата опишана на видеото во прилог може да се користи при роботската хирургија овозможувајќи многу побезбедно и поефикасно зашивање на внатрешните ткива од она што е можно денес.

Овој вид закрпа не е некоја апсолутна новина (видете ја само закрпата опишана Закрпа за вашите скршени срца), но употребата на верзиите достапни во моментов не е без контраиндикации. Всушност, голем дел од нив не се погодни за шевови каде што се јавува поголемо оптоварување, а во одредени услови тие можат да придонесат за инфекции и за преобемно формирање на сврзно ткиво за зараснување на раната.

Новата закрпа на МИТ се состои од три различни слоја на материјал – „лепило“ на база на хидрогел, силиконски слој, кој спречува „лепење“ на закрпата на погрешно место и синтетичка обвивка која штити од бактериски инфекции.

Резултатот е многу побезбедна закрпа, која не е подложна на инфекции и не ја губи нејзината леплива карактеристика дури и по подолготрајно потопување во течност.

Процесот на примена на закрпата е мошне едноставен – таа се витка околу „раката“ на хируршкиот робот кој потоа ја носи во внатрешноста на телото, сè до точката на примена. За закрпата да се расплете и да се постави во правилна положба, се користи мал балон кој, со надувување, прави притисок и помага таа да се залепи за ткивата што треба да се запечатат.

Но, пред конечното одобрување за примена на оваа закрпа во хирургијата, ќе бидат потребни дополнителни тестови и истражувања. Потоа истражувачите планираат да соработуваат со производителите на робот-хирурзи во развојот на повеќе модели на закрпи, кои ќе можат да се приспособат на различните инструменти што ги користат овие механички хирурзи.