Инженерите во Кина отидоа чекор подалеку и ги здружија овие две функции во еден материјал, лесно вградлив како прозорец, а којшто може да ја удвои енергетската ефикасност на просечното домаќинство. Резултатите од нивната работа беа објавени на 3 јули во стручното списание од областа на енергетиката Joule.

За изградба на прототипот способен истовремено да произведува електрична енергија и да го спречува прекумерното загревање, истражувачите требале да направат баланс помеѓу собирањето на светлината за генерирање електрична енергија и нејзиното блокирање заради топлинска изолација, а сепак притоа да ја задржат прозрачната карактеристика на нормалниот прозорец. Со мешање и усогласување на повеќе материјали и хемиски соединенија коишто претходно биле предложени за овие различни намени, тие го добиле уредот којшто ги пропуштал познатите видливи делови од сончевата светлина, а го рефлектирал инфрацрвениот дел од спектарот и истовремено зрачењето блиску до инфрацрвеното подрачје го претворал во електрична енергија.

Грубите пресметки укажуваат на тоа дека теоретски, инсталирањето на прозорци со можност да генерираат електрична енергија и да вршат топлинска изолација за едно просечно домаќинство може ја намали енергетската зависност од надворешни електрични извори за над 50%. Иако оваа проценка претпоставува дека секој квадратен сантиметар од секој прозорец ќе биде опремен со мултифункционални соларни ќелии, за бројката да биде достижна потребно е само мало зголемување на перформансите на моќноста од 6,5%, тврди тимот од Јужнокинескиот технолошки универзитет. Ова особено изгледа остварливо ако се има предвид дека при демонстрацијата не биле користени баш најдобрите органски фотонапонски материјали.

Материјалите со двојна функција сè уште се во зародиш, но авторите очекуваат од нив да го отворат патот кон многу нови корисни технологии.