Почитувани,
Најнапред да ви напоменам дека за прв пат го купив Вашето списание и многу пријатно се изненадив. Имено, месечно купувам најмалку две странски списанија од областа на информатиката и никогаш не сум размислувал да посегнам по некои од нашите технички списанија, поради фактот што не ми оставиле добар впечаток во минатото.
Инаку сум поранешен радио аматер, а денес се занимавам исклучиво со програмирање и многу ме интересираат научно технички содржини од кои човек може да се потсети и да научи нови работи. За темите немам критики, а за квалитетот во ова наше време и услови, со мал број на жители во државата сте повеќе од задоволителни. Ви недостасува "web" страна!
За крај, можам да кажам дека добивте нов читател.
Продолжете така!
Поздрав, Владимир Рибарски
Ви благодарам на пофалбите и ме радува што добивме уште еден читател. Навистина, честопати домашните списанија го немаат квалитетот на странските, но исто така е вистина и тоа дека некои од нив биле гледани со потценување, не поради содржините, туку само поради помалиот технички квалитет (број на страници, хартија, колори...), нешто што е директно поврзано со тиражот, а кој кај нас, за жал, не може да биде голем. Затоа, задоволството од вашите пофалби е големо, особено што доаѓаат од долгогодишен "сопатник" на науката и техниката.
Веб-страна долго време планираме да направиме, но никако не успеавме во морето обврски да најдеме доволно време за тоа, меѓу другото и затоа што сакаме таа да биде квалитетно изработена, барем колку и списанието. Како и да е, се надевам дека наскоро и тоа ќе го направиме, на радост на сите наши читатели.
Слободан Таневски
Здраво ЕМИТЕР!
Пред некое време го изработив ON board испитувачот на транзистори и функционираше сè како што треба. Единствено што ме интересира зошто при вклучување на уредот треба да се почека извесно време за да почне трепкањето на диодите (едната диода свети – трепка подолго време од другата) и по извесно време на уредот свети само едната диода. Однапред ви благодарам.
Ѓоко Тренкоски, преку e-mail
Манифестацијата на појавите кои ги споменувате сигурно е поради ваша грешка која настанала во тек на склопувањето или заради несоодветни компоненти или заради нивно неправилно поставување. За да ја лоцирате грешката најнапред повторно проверете дали сите компоненти се идентични со оние кои се назначени на шемата. Составете го само осцилаторот со IC1. Со мерење на напонот на излезната ногичка (pin 6) убедете се дека осцилаторот осцилира. Различното времетраење на светење на LED-диодите доаѓа од различниот сооднос на времетраењето на излезниот напон на излезот од осцилаторот т.н. duty/cycle (однос импулс/пауза). Оваа променлива зависи од правилниот сооднос на околните RC компоненти на осцилаторот.
Проверете дали транзисторите се правилно поставени и правилно поларизирани. На спојот на отпорникот R5 и отпорникот R6 доведете негативен потенцијал од напонот на напојување - треба да засвети LED 1. Истото, но со доведување позитивен потенцијал ја "запалува" LED 2. Ова е потврда дека транзисторите се правилно поставени и поларизирани.
Уредот е толку едноставен, па затоа не гледам причина зошто не би функционирал. Убаво прочитајте го описот како уредот работи и решението ќе го пронајдете сами.
Петар Аврамовски
Почитувана редакцијо,
Сакам да ви поставам неколку прашања во врска со проектите од ЕМИТЕР 12/2002.
1.Дали може проектот "Ноќен чувар" да работи постојано на ноќна светлина (да не се гаси на одредени периоди) и како би изгледала шемата, ако тоа е возможно.
2. Во проектот "Минијатурен FM предавател" во текстот стои 4 навивки од 6mm , а на сликата има 6 навивки. Колку се важни навивките и нивниот пресек? Дали предавателот успешно работи само кога ќе се доближи до некој радиоприемник, и кој микрофон од наведените е најдобар да се избере?
3. Дали можете да наведете некои web-страни од кои можам слободно да копирам китови од некои проекти.
Однапред ви благодарам.
Борче Костовски, преку e-mail
1. Одговорот е: да, ноќниот чувар од бројот 12/2002 може да работи и како обичен светлосно контролиран прекинувач. За таа цел потребно е да ги направите следните измени:
а) Да ги елиминирате елементите од првиот Шмитов осцилатор: C1,R2,R3 i D1.
б) Пинот 2 од IC1 да го поврзете со пинот 14 од истото коло.
в) Емитерот од фототранзисторот T2 наместо на предвиденото место да го поврзете со пинот 7 од IC1. Во овој случај фототранзисторот треба да се постави на место кое ќе му овозможи да ја детектира само надворешната светлина.
Сепак, како поедноставно решение за таа намена (вклучување светилка при стемнување), ви препорачуваме да го користите колото "Светлосен прекинувач SP-9" од бројот 7-8/98.
2) Верувам дека на сликата не сте забележале добро. Фотографијата е во црно-бела техника и има една мала сенка која личи како навивка, но не е. Ако добро погледнете ќе забележите дека всушност има 4 полни навивки, а потоа со дел од 5-тата навивка, намотката е завршена. Тоа е оригиналната намтока која што доаѓа во кит комплетот. Таа, така како што е направена ги задоволува параметрите кои се бараат од неа и осцилаторот работи во наведеното фреквенциско подрачје. Следете го текстот за изработка на намотката и нема да имате проблем!
Бројот на навивките кој ја сочинуваат намотката, пресекот на намотката, како и дебелината на жицата од која е направена истата, влијаат на нејзините карактеристики. Со самото тоа таа влијае на Колпицовиот осцилатор, кој е употребен во проектот. Промената на карактеристиките на намотката доведува до промена на фреквенцијата на осцилаторот. Ако некои од наведените димензии ги промените, тогаш ќе мора по пат на мерење со мерни инструменти, пресметка или експериментално да ги одредите карактеристиките на намотката.
Предавателот работи "од прва". Следете го текстот и објаснувањата во него и нема да имате проблеми. Доближувањето на предавателот до радио приемникот се користи при неговото нагодување, откако тој ќе се нагоди (како што е опишано во текстот), не е потребно блиско поставување до радио приемникот, бидејќи предавателот има домет од стотина метри, па до преку 1km со добро нагодена и високо поставена антена.
Што се однесува до микрофонот, во текстот е дадено објаснување за тоа кој тип на микрофон какви можности дава. На Вас останува да се одлучите, согласно вашите потреби.
3) Што се однесува до web-страници за китови, на некој од серверите за пребарување (како Google) доволно е да внесете клучен збор за пребарување electronic kit и ќе бидете изненадени што сè ќе добиете. За почеток ви предлагаме да ја посетите следната web-страна: http://www.electronic-circuits-diagrams.com. На неа можете да најдете проекти и китови од скоро сите области на електрониката.
Дејан Трпески и Добре Блажевски-Доц