Почитувано Редакцијо на Емитер. Имам едно прашање до вас. Имам засилувач техникс и сакам да изработам sub woofer засилувач. На техниксот има излезен сигнал за woofer, па сега сакам да изработам засилувач со STK4050 5. генерација и сакам да го искористам филтерот за sub woofer од ЕМИТЕР бр.7-8/2004. Моето прашање е дали може да го исклучам суматорот од R1 и R2 и на нивно место да го поврзам излезот за sub oд техниксот и дали филтерот ќе има доволно побудување за засилувачот со STK? Ако ова не е добро, понудете ми некое подобро решение.
Однапред благодарност.
Мики Пеливан
Ако се извадат отпорниците R1, R2 и R3 и се извади потенциометарот P1, тогаш влезниот сигнал може директно да се врзе на првиот кондензатор од филтерот, па натаму сè ќе биде во ред. Но, влезниот сигнал мора да биде моно, добиен со сумирање на левиот и десниот стереосигнал! Дали сте сигурни дека вашиот засилувач Technics има излез кој дава ваков сигнал? Дали воопшто станува збор за стереозасилувач кој има некаков излез за subwoofer? Или тоа е стандарден surround засилувач, кој има LFE излез? Ако е ова второво, тогаш воопшто не ви е потребен посебен филтер!
Проверете дали станува збор за surround засилувач, или за обичен стереозасилувач со моно излез (сумиран лев+десен канал). Ако е ова второво, проверете во упатството за засилувачот дали овој излез има некакво филтрирање, или не.
Владимир Филевски
Здраво.
Јас сум ваш редовен читател од Охрид. Би сакал господинот Емилијан Иљоски да ми одговори на следниве прашања:
- Како да го одредам SPL на звучникот (ако тоа не е назначено од производителот)?
- Како да ја одредам снагата на звучникот (ако тоа не е назначено од производителот)?
- Дали има одредени лимити колкава би требало да биде големината на кутијата наспрема големината на звучникот (басот) и ако има кои се тие?
- Како да ја одредам (пресметам) длабочината на звучната кутија?
Благодарам однапред.
Љупчо Петрески, преку e-mail
1) Одредувањето на кривата на звучниот притисок (SPL) во зависност од фреквенцијата не е така едноставна работа и бара неколку технички помагала, пред сè, квалитетен микрофон со позната крива на чувствителност. Потоа, системот треба да се калибрира и неминовно треба "глува" соба. Но, постојат и повеќе методи на мерење за да се избегне потребата од скапа "глува" соба. Еден од нив го користи и компјутерскиот мерен уред "Clio", со кој редакцијата ги врши мерењата на звучниците и за кој имаме пишувано во претходните броеви.
2) Не постои недеструктивен метод на мерење на максималната моќност на еден драјвер. Сепак, би можеле да стекнеме претстава колку некој драјвер е моќен ако ја измериме импедансата на драјверот на одредена фреквенција (1 KHz, на пример) со помош на методата опишана во 5. продолжение на серијата "Како до квалитетни звучни кутии?" (ЕМИТЕР бр. 5/07) и со помош на "True RMS" волтметар да го измериме напонот Umax при кој доаѓа до изобличувања кои јасно се слушаат. Тогаш и мембраната на драјверот почнува неконтролирано да се движи. Моќноста на звучникот се одредува по познатата равенка: P=Umax²/Z. Пазете да не ја претерате "работата" и да го уништите драјверот!
3) На повеќе наврати е напоменато дека големината на кутијата не зависи од големината на драјверот (драјверите), туку исклучиво од Thiele-Small параметрите! Не постои горен лимит на волуменот на кутијата во однос на параметрите на драјверот. Најмалиот волумен на кутијата е единствено лимитиран со големината на драјверот. Друга работа е што ќе постигнете со толку мала или голема кутија, а тоа ќе ви го каже некој програм за симулација каков што е WinISD за кој пишувавме во ЕМИТЕР број 4/07!
4) За пресметка на длабочината на кутијата причекајте го седмото продолжение на серијалот "Како до квалитетни звучни кутии?"
Емилијан Иљоски
Почитувана редакцијо на ЕМИТЕР!
Јас сум ваш редовен читател веќе 5 години и претплатник на вашето списание. Прилично сум млад и не сум многу навлезен во тајните на информатиката. Инаку, имам еден сериозен проблем: Мојот брат ставил Setup password на Windows-от од 12 цифри, но го заборавил и сега никако не можеме да влеземе. Распрашував во разни компјутерски продавници, но одговорот секаде беше ист - дека нема шанси без пишување на точниот password да влезам и нема начин да се пробие истиот, па единствено решение би било форматирање на компјутерот. Форматирање на дискот C не доаѓа предвид, бидејќи имам доста важни податоци и документи на него на кои претходно им немам направено backup. Моето прашање до вас е: Како да ја заобиколам процедурата на внесување на точниот password или да го пробијам, ако воопшто постои начин тоа да се направи?
До колку не ми одговорите директно, ве молам да ми препорачате литература за истото.
Однапред ви се заблагодарувам,
Гоце Тренчев од Радовиш
Има еден куп софтвери за "реставрација" на password-и, но наједноставно е дискот да се приклучи на друг систем, да се извадат податоците на друг медиум, а потоа да се интервенира на старата инсталација, па дури и ако тоа значи и преинсталација.
Гунтер Кубе, SET Computers Co.
Враќање" на лозинка што веќе сте ја напишале и сте ја заборавиле може да се случи единствено ако ви текне :) или ако најдете некои програмчиња за пронаоѓање на лозинката. По мое, најдобар начин, доколку не е ставена лозинка на Administrator, е да се влезе преку Safe Mode, да се направи backup на потребните документи или да се проба да се отвори нов user, од каде потоа би се добил пристап до сите податоци на компјутерот. И веќе, на крај, ако сте двајца корисници отворете два User-и на Windows-от за да се избегне истото што се случило сега.
Благоја Пулчески
Постојат повеќе начини за пробивање на лозинка, како и повеќе типови на лозинки.
Доколку е setup pass веднаш пред биосот треба да се ресетира плочата, а доколку има ставено некој pass при само подигање на системот, Windowss XP задолжително прашува дали сте ја заборавиле лозинката по што се оди на чекорите кои се за тоа.
Доколку нема такво нешто и не може да се реши проблемот, а истовремено има повеќе user-и кои се администратори на системот, може да се влезе во safemode и да се направи нов user како администратор и да се извадат податоците, па потоа да се форматира.
Доколку и тоа не е можно, единствено решение е да се извади HDD и да се стави на друга машина, да се направи backup, па потоа да се форматира и да се инсталира одново.
Дејан Ѓошевски, KABTEL Ltd
Има неколку алтернативи како можете да се логирате во својот систем или пак да ги спасите своите податоци.
- Првата алтернатива е доколку немате поставено администраторска лозинка при инсталација или пак по инсталација, проблемот е лесно решлив. Доколку сте во графички мод на логирање на системот, кога ќе дојде делот да ја напишете лозинката стиснете два пати CTRL + ALT + DELETE. Ќе се појави дијалог со вашето корисничко име и поле за лозинка. Во полето за корисничко име напишете администратор и притиснете ентер. Доколку успешно се логирате, едноставно одете во Control Panel -> User Accounts и променете ја лозинката на вашето корисничко име за кое сте ја заборавиле лозинката.
- Втората алтернатива е да повикате некој напреден корисник на Линукс оперативниот систем каде со помош на Live CD лесно би го решил проблемот, било да ја пронајде датотеката со лозинки или пак едноставно да ви направи еден backup на дискот. Но, сето ова под услов податочната табела на дискот да е форматирана како FAT32. За NTFS е малку посложено.
Од мое лично искуство овие две алтернативи речиси секогаш успеваат, ако не првата тогаш втората 95%.
И една моја искрена препорака: не одете по компјутерски продавници да прашувате за вакви проблеми. Таму во најголем број на случаи работат некомпетентни луѓе за вакви или слични проблеми. Компјутерските сервиси се подобро место каде можете да се обратите.
Драган Јованоски
Здраво ЕМИТЕР!!!
Имам еден проблем со програмата што ја презентиравте во вашето списание, па се надевам на ваша помош.
Станува збор за EAGLE 4.1. Оваа програма ја "симнав" од линковите што ги посочивте, но никако не можам да ги направам потребните нагодувања за добиената ППК да биде еднослојна. Откако ќе ја нацртам електричната шема, се префрлам во цртање на монтажната шема во: board, ќе ги преместам елементите во местото предвидено за ППК и одбирам tools - auto... - ok. Добиената ППК е двослојна! Пробав нешто да променам во: tools - Drc.. - во картичката Layer, но без успех. Ако може да се промени нешто за добиената монтажна шема да биде за еднослојна ППК, ве молам објаснете како.
Однапред ви благодарам
Александар.
За да можете да дизајнирате еднослослојна ППК треба преку прозорецот Tools->DRC да се нагоди употреба на два слоја: Top – кој ќе го користите за куси врски и Bottom – кој ќе го користите за водовите кои ќе ги поврзуваат изводите на компонентите.
За да се дизајнира еднослојна ППК воопшто не е препорачливо да се користи AutoRoute опцијата речиси за ниту еден програм за дизајн на ППК. Моето искуство "вели" дека секогаш ние самите ќе дизајнираме далеку подобра ППК од кој било програм кога станува збор за еднослојна ППК. Но, сепак, за проба, по претходното нагодување треба да се одбере конфигурацијата прикажана на сликата, по активирање на опцијата: Tools->Auto.
Благој Ќупев