Врвот на делумното затемнување се случи денес во раните утрински часови. Притоа 97 % од Месечината беше затемнета од сенката на Земјата, попримајќи ја карактеристичната црвеникава боја на цигла. Целиот настан траеше неколку часа.

Затемнувањето беше видливо од целата територија на САД, Канада, Мексико, како и од делови од Јужна Америка, Полинезија, Австралија и Кина, соопшти НАСА. Целосно или делумно видливо беше во северните делови на Европа, а нешто пократко од западните делови на нашиот континент, додека од Македонија и регионот не беше воопшто видливо.

Целиот настан започна во 6 часот и 2 минути по Гринич (GMT), и од тој момент набљудувачите од споменатите региони, се разбира оние кои имаа непречен поглед без облаци кон небото, можеа да го набљудуваат навлегувањето на Месечината во земјината полусенка. Во 7 часот и 18 минути (GMT) Месечината почна да навлегува во сенката на Земјата. Карактеристичната боја на рѓа или цигла, веќе беше видлива некаде од 8 часот и 50 минути, за при максимумот на ова делумно затемнување на Месечината, кое се случи нешто пред 9 часот и 23 минути по Гринич, таа да ја добие својата најживописна нијанса.

Месечината излезе од земјината сенка во 10 часот и 47 минути, а целиот настан официјално заврши во 12 часот 3 минути и 40 секунди по Гринич, кога нашиот сателит ја напуши зоната на полусенка.

Зенитот на денешното затемнување на Месечината снимен до100 mm f/9 refractor снимен од Старквил, Мисисипи, САД (фото: Дејвид Випф / Википедија)

За потсетување, карактеристичната црвена боја на Месечината во моментите на затемнување се должи на феноменот познат како Рејлиово расејување. Причината за обојувањето е Земјината атмосфера. Имено, земјината атмосфера повеќе го расејува синиот делот од спектарот на сончевата светлина, а црвената боја проаѓа низ земјината атмосфера и паѓа на Месечината, осветлувајќи ја малку. Од истите причини небото на зајдисонце и изгрејсонце е со портокалова боја. Дополнително за нијансите на црвената боја зависи и количеството прав во атмосферата – колку е поправливо, толку поизразита црвена боја ќе има Месечината. Доколку Земјата би немала атмосфера, Месечината при целосното затемнување сосема би ја снемало.

Денешното делумно затемнување на Месечината траеше повеќе од 6 часа. Последен пат делумно затемнување на Месечината траело толку долго во 1440 година, кога Инките го граделе Мачу Пикчу. (Фото: Бабак Факхамзаде / Unsplash).

За време на ова затемнување, Месечината се наоѓаше во најоддалечената точка од Земјата, што го забави нејзиното привидно движење по небескиот свод, па така ова затемнување траеше навистина долго, вкупно 6 часа и 2 минути.

Претходното најдолго затемнување на Месечината се случи во 2018 година и траеше два часа и 58 минути (фотографии тука) , а последното видливо од кај нас се случи во мај оваа година.

Ова делумно затемнување на Месечината му претходи на целосното затемнување на Сонцето кое на 4 декември оваа година ќе биде видливо од регионот на Антарктикот. Следното затемнување на Месечината е “најавено” за мај 2022 година.

Повеќе интересни податоци за затемнувањата на Месечината и Сонцето може да прочитете во “10 факти за... ЗАТЕМНУВАЊАТА”