Носталгијата по лампите, на која сме сведоци веќе низа години, не е само носталгија за старото, убавото од младоста, за она врз кое времето оставило патина, неизбришлив и драг белег, туку се јавува како потреба која треба да го задоволи денес изострениот вкус и кај пошироката публика, а да не зборуваме за луѓето што се врзани професионално за процесот на слушање. Впрочем, звукот добиен од лампите е поблизок до она што сака да го слуша увото.
Обновениот интерес за лампите и за уредите направени со нив, пред сè процесорите, беше поттик за некои производители да се зафатат со градба на модерни уреди со лампи. Меѓу истакнатите фирми што повеќе години го форсираат таквото производство, и во тоа има успех, е фирмата TLAudio. Оваа констатација се поткрепува со последниот производ – ламповата тонска миксета VTC (Vacuum Tube Console) – првата современа студиска тонска миксета од голем формат со лампи после шеесетите години.