Пред сè, зошто е наречена зелена? Затоа што оваа ТВ-опрема е опрема за подобра животна околина, која штеди енергетски, просторни и материјални ресурси. Навистина е зачудувачки како од ден на ден електронските уреди се смалуваат. Некогаш за сместување на уреди за едно продукциско студио со четири камери, за монитори, видеомиксета, генератор на ефекти, дистрибуција на сигнали, синк-генератор, осцилоскоп, вектроскоп и друго, но само за видеоделот, требаше најмалку 5 река (rack, ормар) со висина од два метри. Денес сето тоа се сместува во еден до еден и пол рек! Ова е што се однесува до просторот, но на тоа се надодава потрошувачката на енергијата за напојување и ладење, каблите и другите материјали... Тоа е огромна заштеда, која придобивките од енергија, простор и материјал ги претвора во финансиски придобивки, во намалување на цената на ТВ-опремата, а во крајна линија ја намалува вкупната цена на крајниот производ - програмата, како и вкупниот процес на производство на многу различни видео и аудиопродукти, како што се драми, филмови, серии, спотови за маркетинг и друго.