Во учебната 2000/2001 година во ДЕТУ "Михајло Пупин" во Скопје беше реализиран еден интересен проект под наслов "Средновековни културно-историски споменици во Македонија". Реализатори на проектот беа учениците, членови на секцијата "Млади историчари" под водство на професорот Мирослав Бошковиќ. Проектот траеше една година, при што беа посетени и проучени голем број средновековни цркви и манастири на територијата на Република Македонија. Кон нашите ученици често ни се придружуваа и ученици од неколку средни училишта во Скопје, потоа планинари, извидници како и претставници на мисии од неколку запа-дноевропски земји кои се восхитуваа од културно-историските вредности на средновековните споменици и природните убавини во Македонија. За читателите на ЕМИТЕР имаме пријатна можност да презентираме дел од резултатите од проектот, а се однесуваат на развојот на средновековната архитектура и живопис во Македонија.