Одеднаш времето во целиот свет почнува да се менува: во Јапонија врне град со големина на тениски топчиња, во Њу Делхи снежни врнежи, Њујорк под вода, а целата северна хемисфера завршува окована во мраз како резултат од новото ледено доба кое настанува како последица на глобалното затоплување. Тоа се накратко сцените од во моментов актуелниот светски филмски хит Ден потоа. Но, дали сите овие слики е можно да ги видиме во живо. Пред некоја година неколкумина светски реномирани стручњаци од областа на глобалната метеорологија храбро излегоа токму со вакво тврдење, дека глобалното затоплување ја нарушува кревката рамнотежа во движењето на морските струи и нивното глобално влијание врз климата. Во овој напис ќе прозбориме токму за оваа проблематика. Можеби откако ќе го прочитате многу работи видени на големото платно нема да ви се чинат така неверојатни.