Овој алармен уред со батериско напојување е дизајниран за долготрајна автономна работа. Тој може да се употреби секаде каде што намерата за кражба е поврзана со тресење, односно изместување од хоризонтална положба, како на пример: шкафови, врати, кутии за накит или алат итн. Појдовна идеја беше да се искористи како аларм на влезна врата (закачен на кваката би се активирал секогаш кога таа ќе се притисне), но се покажа дека листата на можни примени е практично неограничена. Исклучување на калориферот или греалката при превртување е само една од многуте примени. Исклучително е погоден за употреба таму каде што алармниот уред останува без надзор во долг временски период.