Без сомнение, Андре Ситроен спаѓа во потесниот круг на кандидати кои можат да ја понесат титулата Гордост на француската нација. Маркетинг-мајстор кој го разбирал вкусот на јавноста. Основач е на фирмата "Ситроен" која храбро дури и по цена на самоуништување го трасира патот по кој треба да се оди во светот на автомобилската индустрија. Кога оваа фирма дејствува самостојно и ги има лостовите во своите раце, тоа го прави без пардон. Со еден збор: творец е на револуции во светот на автомобилите од кои на конкуренцијата í требаат децении да се соземе. Техничките решенија на нивните конструкции се оригинални, вдахновени и ненадминати. Ретки се оние кои можат да се пофалат со вакво нешто, а тоа во изобилство го има во "Ситроен".