Динамичната и отворената природа на интернет-мрежата, уште од своите први денови даде можност за разни форми на напади и злоупотреба. Еден од најраспространетите начини на кои се злоупотребува интернетот е методот фишинг (phishing). По дефиниција оваа измама подразбира користење на електронските писма за масовно дистрибуирање на пораки со кои жртвата се наведува да посети одредена веб-локација. На оваа локација тие следејќи ги дадените инструкции да ја потврдат својата банкарска или друг вид сметка, ги оставаат своите лични податоци. Жртвата во овие случаи не се сомнева дека виталните информации за идентификација му ги предава директно на криминалецот, кој потоа може да ги употреби за да стекне материјална корист.