"Фантастичното патување" во реалност го изведе тимот на Силвен Мартел, канадски истражувач во лабораторијата за нанороботика при Политехничката школа во Монтреал. Тие, слично како во споменатиот филм, успеја да маневрираат микроуред низ артериите на една свиња.

Силвен Мартел и неговиот тим во лабораторијата за нанороботика при Политехничката школа во Монтреал, Канада

За што се работи? Мини-подморницата од филмот во реалноста сега е капсула со додатоци на легура од хром и челик. Нејзиниот дијаметар изнесува 1,5 mm и тежи едвај нешто повеќе од стоти дел од грамот. Оваа големина и овозможува на капсулата да се движи непречено низ артериите со просечна големина како што е, на пример, каротидата, чиј пречник е 4 mm. Патувањето низ ситните крвни садови со големина од десетина микрометри или капилари со пречник од едвај 7 микрометри, како што тоа го прави мини-подморницата во филмот, со оваа капсула сè уште не е можно. Сепак, истражувачот Силвен Мартел смета дека може да го иствариу со намалување на големината на капсулата, правејќи неколку адаптации на техниките со кои се управува со оваа капсула. Но, токму тука лежат и вистинските предизвици при остварувањето на овој проект.

Канадската микрокапсула е само едно оружје во арсеналот на орудија со коишто современата медицина се бори против ракот. Во овој арсенал се наоѓаат и други теледиригирани орудија слични на канадската капсула или, пак, опремени со "глава за барање на целта", но поголемиот дел од нив се сè  уште далеку до употреба. Ова не е случај со автономните т.н. "проектили" коишто се наоѓаат во последната фаза на клинички испитувања пред нивната употреба.