Ветерот, како исконска природна сила, отсекогаш ги фасцинирал луѓето со својата моќ. Токму затоа можноста за негово скротување и искористување, претставува отворен предизвик. Во првата експериментална, еколошка и енергетски независна куќа во Македонија се обидовме да одговориме на овој предизвик. Во куќата е монтиран систем за производство на електрична енергија од ветер со двојна намена. Надвор од грејната сезона струјата добиена од ветер се користи за електричните потрошувачи во куќата, а во грејна сезона таа се користи за загревање на водата во централниот резервоар. На овој начин енергијата од ветерот се искористува со 96 % во текот на целата година.