VIA Tehnologies Inc. е тајванска компанија која првенствено е позната по производство на чипсетови за AMD и Intel платформи, како и производство на матични плочи и мемории. Но, компанијата во своите погони произведува и процесори, па иако во сенка на големите играчи, VIA во своето портфолио има низа на успешни x86 процесори од кои првите модели се уште од далечната 1990 година. Тоа што е карактеристично за VIA на ова поле е тенденцијата на производство на процесори со ниска потрошувачка на енергија, која понекогаш одеше и на штета на перформансите. Компанијата очигледно не отстапи од овој правец, па откако најави дека нејзините инженери работат на нова процесорска архитектура со кодно име Isaiah, ова лето се случи и официјално претставување на моделите од новата генерација процесори, осма по ред, наречени VIA Nano Processor.