Чипсетот P45 може да се смета како наследник на успешниот и веќе во голема мерка застапен на пазарот - P35 чипсет. Практично се работи за чипсет изработен со 65-нанометарска технологија (P35 е изработен со 90-нанометарска технологија) кој нуди мноштво подобрувања и нови карактеристики во однос на својот претходник. Со кодно име "Eaglelake", чипсетот P45 е дизајниран за маинстреам пазарот. Компанијата Gigabyte која е позната по производството на висококвалитетни матични плочи и овој пат е во тек со сите случувања во оваа област, па затоа сакајќи да понуди што е можно подобри перформанси на своите производи, ја претстави матичната плоча Gigabyte GA-EP45-DS3R, која е базирана токму на P45 чипсетот.