Помеѓу многуте помошни уреди што се монтираат на современите возила, паркинг сензорот се смета за еден од покорисните. Софистицираните фабрички паркинг сензори автоматски го сопираат возилото кога ќе се најде на некое минимално растојание од друго возило или каков било друг објект. За жал, овој уред не е таков. Тој дава визуелна и звучна индикација за постоење на пречка зад возилото. Притоа, со намалување на растојанието се менува и нивото на звукот со што се добива груба претстава за растојанието. Сите радари, помалку или повеќе, работат на идентичен начин. Предавателот емитира сигнал кој се рефлектира од метата. Приемникот го регистрира рефлектираниот сигнал и со пресметување на времето од емитирањето до приемот го одредува растојанието помеѓу предавателот и метата. За големи растојанија задолжително се користи сигнал од подрачјето на радиофреквенции, а за растојанија до неколку десетици метри може да се користи и ултразвук. Брзината на простирање на ултразвукот изнесува 343m/s, односно околу еден метар на секои три милисекунди. Тоа значи дека за кратки растојанија ултразвучните радари се рамноправни со останатите, но тие се далеку попрактични, бидејќи се едноставни за изработка. Токму од таа причина радарот во овој паркинг-сензор користи ултразвук.