Она што во последните неколку години го донесе развојот на индустријата за мобилни уреди и тенденцијата во џебните миленичиња да се интегрираат што повеќе функции, е навистина неверојатно. Ако се земат предвид компонентите кои се вградуваат во нив, а, пред сé нивните перформанси, најверојатно за 5-6 години единствена разлика помеѓу џебен и персонален компјутер ќе биде нивната големина. Во категоријата уреди кои го поткрепуваат ова мое предвидување секако е и џебниот компјутер кој е предмет на овој тест. Имено, станува збор за iPAQ 610, кој неодамна го имаше своето официјално претставување заедно со други четири нови iPAQ модели 110, 210, 310 и 910, а е дел од серијата Business Navigator на Hewlet Packard.