Една од несомнено трајно највлијателните науки за развојот на човечките мисли, логичното размислување и воопшто погледите на светот – математиката,  во текот на десетина векови претставувала основен параметар за развојот на цивилизацијата. Развојот на човековите мисли, кој се огледува во напредокот на математиката, е сврзан со изборот на реперот и логичното заклучување. Често на обичниот смртник тешко му е да осознае каде завршува логиката, а каде почнува математиката. Прашањето се наметнува само од себе: Постои ли точна граница што ги дели овие две научни области? Прецизноста и супериорноста на математиката можеме да ја илустрираме на најразлични начини и форми, како во теоријата, така и во праксата. На пример дали некој некогаш се запрашал колку живее едно влакно коса на главата на човекот? Или колкаво треба да биде едно парченце хартија со тежина колку што тежи еден атом?