Често поставувано прашување е што е толку посебно во еден обичен двокрилец, што меѓу безброј други типови авиони го воведе во историјата на авијацијата во светот, а и во военото воздухопловство во екс ЈУ-просторите, едноставно, авион кој не може да се заобиколи? Имаше поубави, побрзи, борбено далеку помоќни. Еден од одговорите е во цитатот: "Доколку сте Американец или од поранешната западна Европа, шансите да не сте чуле за У-2, По-2 се големи. На друга страна, доколку сте биле на германска страна во текот на Втората светска војна, особено на источниот фронт, од името По-2, или "Nähmaschine" може да ви се повратат ужасните спомени на чуден непријатен звук од мотор кој ви прелетува ниско над главата за потоа да уследат експлозии на бомби кои Вам и на вашите другари ви го нарушуваат сонот". Тој необичен звук јас го слушнав во далечната 1967 година, во летачкиот центар Вршац, и го доживеав како звук на ротофреза или трактор кој прелетува над покривот. Изненадувањето беше големо не само за мене, но и за поискусни, кога видовме дека всушност не прелетува По-2 со ѕвездест мотор.