Аналогните ИК, од своја страна, се многу помалку комплексни од дигиталните ИК кога ги споредуваме според бројот на употребените транзистори во еден чип. Но, поради строгите и прецизни задачи кои треба да ги извршува едно аналогно коло, неговото проектирање се смета за врвен креативен досег, рамен на уметност, а неговите творци се возвишуваат на ниво на вистински волшебници.
Еден од таквите беше и Ханс Камензинд – неповторливото NE555 е само еден мал дел од неговиот творечки опус. Тој го создаде првиот засилувач на моќност во класа D и го воведе концептот на фазно затворена јамка – сестрано користен концепт до денешен ден.