Покрај познавање на теоријата и практиката од разни области на електрониката секој електроничар треба да има и добри познавања на мерната опрема и мерните постапки. Меѓутоа голем дел од електроничарите, дури и некои од понапредните, не ја познаваат доволно оваа проблематика. Посебно големи проблеми на ова поле имаат почетниците што и самите го истакнуваат во своите обраќања до редакцијата. Затоа одлучивме, во неколку продолженија, да дадеме еден краток преглед на мерната опрема и мерните постапки што се применуваат во електрониката. Со оглед на ограничениот простор и со оглед на тоа што ова се први написи на оваа тема во ЕМИТЕР, во оваа серија написи се задржуваме само на најосновните работи што треба да ги знае еден електроничар за мерењата и мерната опрема во електрониката. Во претходните продолженија од оваа серија написи се запознавме со основната теорија за мерењата и со најчесто користените инструменти во електрониката. Во овој и следните броеви ќе дадеме краток опис на разни мерни постапки кои во електрониката имаат најширока примена - мерења на напон, струја и отпорност со унимер.