Засилувачот JoLida SJ 502 A има класичен дизајн, на кој што нема што да му се забележи. Употребена е металик-црна боја на финишот на куќиштето, а натписите се со златна боја. Од предната страна се поставени прекинувачот за вклучување и три копчиња: селекторот на влезови, контролата за баланс и потенциометарот за јачина на звукот. Во задниот ред доминираат централно поставениот мрежен трансформатор и од двете негови страни нешто помалите излезни трансформатори. Во средниот ред се четирите големи излезни пентоди 6550, а напред се четири мали двојни триоди - две 12AX7 и две 12AU7. По две електронски цевки 6550 за секој канал, врзани во push-pull спој обезбедуваат солидни 60 W синусна моќност.