Многу читатели ни бараа проекти и шеми за засилувачи со електронски цевки. Им ја исполнуваме таа желба со оваа серија теоретски написи и практични проекти, но заинтересираните треба да имаат на ум дека електронските цевки работат на ВИСОК НАПОН кој е ОПАСЕН ПО ЖИВОТ, така што проектите што ќе бидат објавени се наменети САМО за поискусните електроничари. Бидејќи засилувачите на моќност се комплицирани и скапи за градба (заради нивните излезни трансформатори), серијава ќе ја започнам со предзасилувачки склопови, кои се едноставни, но ефикасни и со многу добри карактеристики. Засилувачите на моќност ќе дојдат на крај, до кога се надевам дека ќе најдам некој кој би можел да ги изработува излезните трансформатори по прифатлива цена. Уште еднаш ќе напомнам дека најважни се излезните трансформатори и на нив не смее да се штеди – тие одредуваат дали звукот ќе биде добар или катастрофален.