Во очекување да ни се случи дигиталната телевизија, единственото нешто што нестрпливите можат да го сторат е подобро да се запознаат со карактеристиките и параметрите со кои, искрено се надеваме, наскоро ќе се сретнеме. Во светот на аналогните видео сигнали, резолуцијата на сликата се изразува во линии по слика (lines per picture height LPH) и ги означува губитоците предизвикани од процесот на хоризонтално и вертикално семплирање на сликата. Изборот на ширината на опсегот на сигналот може да обезбеди приближно еднаква хоризонтална и вертикална резолуција во двата современи стандарди 525 линии/60Hz и 625 линии/50Hz. Дигиталното процесирање на видео сигналите предизвика пресврт во самиот концепт на резолуцијата на слика...