Објектот на Меѓународната вселенска станица (ISS) помина преку Сонцето во 11 часот 17 минути и 41.56 секунди по македонско време. Во тој момент ISS се наоѓаше на околу 480 километри од нас.

Овој астрономски настан може лесно да се предвиди неколку дена однапред со помош на веб-страницата Transit Finder. Потребно е само временските услови да бидат поволни за моментот да може успешно да се фотографира и сними.

Транзитот на МВС пред Сонцето набљудуван од Скопје на 2 август 2026 година Фото: Боби Кузманоски, Скопско астрономско друштво

Транзитите најдобро се снимаат кога Сонцето е што е можно повисоко на небото, односно во близина на меридијанот и неговата горна кулминација. Па иако сме во екот на топлотниот бран, тоа значеше околу еден час работа со телескопите на најголемата жештина. Сепак, овојпат среќата беше наклонета бидејќи трасата на транзитот помина практично „низ нашиот двор“, па за добра снимка немаше потреба од изминување на десетици километри, како што често се случува.

Боби Кузманоски, Христијан Петрески и Радан Митровиќ од САД ја поставиле опремата во близина на просториите и помошниот стадион на ФСМ во Нови Лисиче, Скопје. Иако планот бил целата опрема да биде целосно подготвена најмалку 10–15 минути пред транзитот, сите системи биле ставени во состојба на целосна подготвеност буквално во последните една до две минути пред да се случи транзитот.

Боби Кузманоски фотографирал со помош на најголемиот телескоп за астрофотографија во сопственост на Скопското астрономско друштво.

“Со своите неверојатни 2800 mm фокална должина, Celestron C11 Edge го исполни целосниот full-frame сензор, па Сонцето не го собираше во еден кадар и беше пресечено на горната и долната страна. Поради тоа, уште на почетокот морав да направам посебни кадри од горниот и долниот дел за да ги спојам во целосна финална фотографија”, вели Боби Кузманоски.

Транзитот на МВС пред Сонцето набљудуван од Скопје на 2 август 2026 година Фото: Боби Кузманоски, Скопско астрономско друштво

Со цел да извлече што повеќе детали од површината на Сонцето и сончевите дамки, тој најнапред направил 200 фотографии за стакирање (stacking). Потоа, во точниот момент на прелетот, уловил 12 фрејма на кои јасно се гледа МВС (камерата снима со 20 фрејмови во секунда, а прелетот траел сè на сè 0,60 секунди).

Благодарение на додадените горен и долен дел на оригиналната фотографија, се доби фрејм од околу 60 мегапиксели. Ова ми овозможи да направам и дополнителен исечок (crop) од централниот дел кој ги прикажува само дамките и МВС, а сепак да остане доволно висока резолуција за пристоен принт со голем формат.