Вчера во Келн, Германија, беа отворени најголемиот меѓународен саем и конференција посветена на широкопојасниот интернет, медиумите и поврзаноста – ANGA COM. Настанот којшто ги обединува на едно место мрежните оператори, добавувачите и провајдерите на содржини за сите прашања поврзани со широкопојасниот интернет и дистрибуцијата на медиуми, ANGA COM се одржува од 19 до 21 мај.
Клучните теми на ANGA COM ги опфаќаат гигабитните мрежи, FTTH, HFC, 5 G, OTT, AppTV, Cloud TV, видео стриминг, вештачка интелигенција, паметни градови и паметен дом. Последниот ANGA COM имаше 480 изложувачи од 35 земји и повеќе од 23 000 учесници од преку 90 земји. Притоа меѓу најголемите изложувачи може да ги најдете водечките телекомуникациски продавачи – Deutsche Telekom, Vodafone, Deutsche Glasfaser, Deutsche GigaNetz, Tele Columbus, Unsere Grüne Glasfaser, NetCologne, M-net, ProSiebenSat.1, RTL Television, Apple, Amazon Prime Video, UFA, Sky и DAZN.
Во текот на овие три дена има мноштво презентации на нови производи, решенија и технологии, како и иновации од областа на широкопојасниот пристап и мрежната поврзаност. Токму затоа тука се и нашите деловни соработници од компанијата All4Net, кои секогаш ги следат новите текови од оваа индустрија и заедно со нивните партнери од странство ги носат и применуваат овие решенија дома во Македонија.
Организатор на ANGA COM е ANGA Services GmbH, филијала на ANGA Association of Broadband Networks. Членови на здружението се водечките компании во германскиот бизнис со широкопојасен интернет (тука вклучувајќи ги Дојче Телеком, Водафон и Дојче Гласфазер) кои им обезбедуваат телекомуникациски услуги на повеќе од 40 милиони потрошувачи во Германија.
