ФЕИТ е домаќин на повеќе од 70 учесници од земјата и странство, што го прави најголем настан од ваков карактер на нашите простори. Студентите, распределени во пет натпреварувачки дисциплини ќе развиваат роботски системи што препознаваат визуелни и звучни команди, дизајнираат интелигентни агенти за динамични сценарија, ќе комбинираат машински вид со роботика за автоматизирано сортирање и – за љубителите на брзината – ќе се натпреваруваат во програмирање на автономни тркачки возила.

Овие активности не се само вежби во кодирање и хардвер – тие се лаборатории на креативност, соработка и решавање на комплексни проблеми. Дополнително, во текот на оваа недела, студентите имаат можност и да слушнат предавања од врвни експерти, да се надградуваат, да поставуваат прашања, и да добијат повратна информација која ќе им биде драгоцена во нивниот развој. На тој начин, RoboMac остварува уште една значајна функција, а тоа е да биде мост помеѓу академијата и индустријата, меѓу знаењето и практиката.

Работејќи во тимови, студентите – учесници на Робомак 2026 имаат можност да ги употребат своите теоретски знаења и практични вештини, истите да ги надоградат и усовршат, како и да соработуваат со други студенти од земјата и странство, со цел да го освојат првото место во својата категорија.

Категориите во кои учесниците може да се натпреваруваат се:
• Detect the Intruder > Hardware-software co-design for detecting a misaligned element.
• AI Football > Program intelligent agents to find and eliminate opponents in a dynamic environment.
• Robotic Arm Challenge > Combine robotics and machine vision to accurately sort objects.
• The VoiceBot Challenge > Command your VoiceBot to victory in this speech-driven robotics competition.
• Self Racing Cars > Program and unleash NVIDIA JetBots for self-racing car showdown.

Финалниот натпревар во сите категории ќе се одржи на 25.4.2026.

RoboMac Junior, по шестти пат, ги отвора вратите за најталентираните средношколци од четврта година од 30 средни училишта од  Македонија. Тука натпреварите се поделени во две категории: RoboMac Junior – АВТОНОМНА МОБИЛНА РОБОТИКА (организирано од Институтот за автоматика и системско инженерство при ФЕИТ) и RoboMac Junior – ПАМЕТНА ЕЛЕКТРОНИКА ЗА АВТОНОМНИ ВОЗИЛА (организирано од Институтот за електроника при ФЕИТ ).

Во текот на целиот настан, учесниците ќе имаат можност за споделување знаења, како со наставниците и асистентите на Факултетот, така и со своите врсници – натпреварувачи, а ќе имаат можност и за работа во тимови. Предвидените екипи се состојат од по тројца учесници од различни училишта. Сите учесници и ментори ќе добијат благодарници за учество, а за најдобрите следуваат и медали.

Но, освен активностите од натпреварувачки карактер, учесниците на RoboMac Junior имаат можност да следат и неколку предавања во кои ќе се претстават популарни теми од роботиката, вештачката интелигенција и електрониката, одржани од професори и експерти во областа. За нив, ова е шанса не само да ги покажат своите вештини, туку и да се запознаат со ФЕИТ и можностите што ги нуди факултетот.

Финалниот натпревар на RoboMac Junior е закажан за 22.4.2026.

Како и секоја година носители на настанот се македонската секција на ИЕЕЕ (IEEE – The Institute for Еlectrical and Еlectronics Еnginеers), преку нејзиниот студентски огранок при УКИМ и Факултетот за електротехника и информациски технологии, а е во коорганизација со Факултетското студентско собрание – ФЕИТ.