Откако во декември Австралија забрани пристап до голем број платформи за децата под 16 години, а Австрија и Данска објавија слични мерки, Франција го предводи нападот во Европа со закон што ќе ги забрани социјалните медиуми за лица под 15 години, уште оваа година.
Франција се приближува кон забрана за пристапот до социјалните медиуми за деца под 15 години, потег што би ја направил втора земја во светот што ќе преземе таков чекор. Францускиот претседател Емануел Макрон сака забраната за социјални медиуми за лица под 15 години да стапи на сила од 1 септември.
Планот за забрана доаѓа во услови на растечка загриженост за влијанието на апликациите, вклучувајќи ги Snapchat, TikTok, Instagram и X (порано Twitter) врз менталното здравје на децата. Со поддршка на претседателот Емануел Макрон и неговата партија Ренесанса, долниот дом на францускиот парламент усвои закон за забрана за користење социјални медиуми од страна на одредени возрасни групи.
Иако рокот не е одреден, француската влада известува дека ќе го стори тоа во септември оваа година.
„Од 1 септември, нашите деца и адолесценти конечно ќе бидат заштитени. Ќе се погрижам за тоа“, рече Макрон во објава на X. За законот сега треба да гласа францускиот сенат, а владејачката коалиција на Макрон верува дека тоа ќе се случи на седницата закажана за 16 февруари. Доколку Сенатот гласа за законот, ќе се формира заеднички комитет со претставници од горниот и долниот дом на парламентот за да се финализира текстот.
Одлуката за тоа кои платформи ќе бидат забранети ќе му биде оставена на францускиот медиумски орган, Аркам, бидејќи самиот закон не дефинира кои платформи ќе бидат опфатени, а кои не.
Авторката на законот, пратеничката од партијата Ренесанса, Лор Милер, изјави дека тој ќе биде сличен на австралискиот и веројатно ќе им забрани на лицата под 15 години да користат Snapchat, TikTok, Instagram и X.
Австралија повеќе не им дозволува на децата под 16 години да креираат сметки на Facebook, Instagram, Kik, Reddit, Snapchat, Thread, TikTok, Twitch, X и YouTube.