Моментот кога вештачката интелигенција ќе ја надмине колективната човечка интелигенција постепено се приближува, според Илон Маск, кој ги сподели своите предвидувања за вештачката интелигенција на Светскиот економски форум во Давос. Маск верува дека вештачката интелигенција наскоро ќе ја надмине човечката интелигенција, дека ќе ги преземе повеќето (ако не и сите) работни места, па дури и ќе ги помести границите на човечкиот животен век.

„До 2030 или 2031 година, вештачката интелигенција ќе биде попаметна од целото човештво заедно“, рече Маск, додавајќи дека би можела да ги надмине луѓето во когнитивните способности до крајот на оваа година.

Ваквите претпоставки се вклопуваат во пошироката слика за иднината што Маск ја опишува со месеци – свет во кој вештачката интелигенција и роботите не само што ќе им помагаат на луѓето, туку ќе ги преземат и повеќето работни места. На неодамнешниот американско-саудиски инвестициски форум во Вашингтон, Маск ја изложи својата визија за иднина во која работата престанува да биде неопходност.

Илон Маск и извршниот директор на БлекРок, Лери Финк, присуствуваат на 56-от годишен состанок на Светскиот економски форум (WEF) во Давос, фото: Ројтерс/Дени Балибус

„Моето предвидување е дека во следните 10 до 20 години работата ќе стане опционална. Ќе биде како да се игра спорт или да се игра видео игри“, рече Маск. „Ако сакате да работите, тоа е како да одлучите дали да купите зеленчук во продавница или да го одгледувате во вашиот двор. Одгледувањето е многу потешко, но некои луѓе го прават тоа затоа што уживаат во тоа.“

Таквиот свет, според мислењето на Маск, ќе биде можен благодарение на работната сила од милиони роботи и значителното ниво на продуктивност што тие ќе го донесат. Затоа тој сè повеќе ја турка Тесла надвор од опсегот на производителите на електрични автомобили и се фокусира на хуманоидните роботи Оптимус, за кои верува дека ќе сочинуваат дури 80 проценти од идната вредност на компанијата.

Автоматизацијата, верува Маск, ќе промени бројни индустрии, вклучително и медицината. Во една од неговите неодамнешни изјави, тој предвиде дека во рок од десет години бројот на роботи ќе го надмине бројот на човечки хирурзи и ќе обезбеди поквалитетна медицинска нега отколку што е достапна денес дури и за најмоќните. Кога станува збор за здравјето на луѓето, Маск оди чекор понатаму – продолжување на човечкиот живот.

„Програмирани сте да умирате, но ако ја промените програмата, ќе живеете подолго“, рече тој, додавајќи дека со помош на вештачката интелигенција, дури и ограничениот човечки животен век би можел да стане само уште еден „технички проблем што треба да се реши“.

Сепак, додека Маск ја гледа иднината како свет без недостиг и без пари, многу експерти предупредуваат дека ова сценарио има и потемна страна. Веќе постојат знаци дека вештачката интелигенција би можела целосно да замени одредени работни места, да ја продлабочи економската несигурност и да ја промени структурата на пазарот на трудот побрзо отколку што општеството може да се прилагоди, објавува Fortune.

Со други зборови, ако работата ја изгуби својата економска вредност, човештвото ќе мора да размисли не само за економијата, туку и за самата структура на општеството - и ова е прашање на кое, засега, дури и најпаметната вештачка интелигенција нема јасен одговор.