Додека многу корисници на ChatGPT бараат помош за сè, од терапија за врски до пишување деловни е-пораки, па дури и претворање слики од нивните миленици во човечки форми, користењето на вештачка интелигенција доаѓа со одредени ризици за приватноста.
Според Џенифер Кинг, експерт во Институтот Стенфорд за вештачка интелигенција центрирана на човекот, сè што внесувате во четбот може да стане јавно, бидејќи вие во истиот момент „ја губите сопственоста врз тие податоци“.
Затоа е важно да се следат неколку основни правила при комуникацијата со четбот со вештачка интелигенција. На својата веб-страница, OpenAI ги предупредува корисниците да не споделуваат чувствителни податоци, додека Google ги советува корисниците на Gemini да не внесуваат доверливи информации.
Ако користите вештачка интелигенција, еве пет работи што никогаш не треба да ги споделувате со ChatGPT или слични четботови.
Никогаш не споделувајте информации што би можеле да го откријат вашиот идентитет, како што се вашиот број на лична карта, возачка дозвола, пасош, датум на раѓање, адреса или телефонски број. Додека некои четботови се обидуваат да идентификуваат и отстранат чувствителни информации, најдобро е целосно да ги избегнувате.
Здравствените податоци се заштитени со законите за приватност, но вообичаено чет-ботовите со вештачка интелигенција немаат ваква заштита. Ако сакате да побарате од ChatGPT да ви ги протолкува медицинските резултати, Кинг советува прво да го исечете или редактирате документот, оставајќи ги само резултатите од тестот, без лични информации.
Никогаш не споделувајте броеви на банкарски сметки, броеви од кредитни картички, инвестиции или други финансиски информации, бидејќи некој би можел да ги хакира и да ги искористи за пристап до вашите пари.
Иако можеби ви се чини згодно да споделувате кориснички имиња и лозинки за чет-ботот да може да ја изврши задачата, имајте на ум дека тој не доаѓа со заштита на податоците на вашата сметка. Наместо тоа, користете менаџер за лозинки за да ги зачувате тие информации.
Ако користите ChatGPT или други алатки за вештачка интелигенција за работа – на пример, за пишување е-пошта или уредување документи, постои ризик ненамерно да откриете доверливи податоци за клиенти или трговски тајни. Некои компании користат внатрешни верзии на системи за вештачка интелигенција или дополнителни слоеви на безбедност за да го заштитат ова.