За информација на читателите, сведочењата во сенатот на САД се даваат под заклетва што според американските закони значи дека давањето лажна изјава под заклетва за време на расправата во Сенатот е кривично дело познато како кривоклетство (лажно сведочење). Во продолжение ќе презентираме извадоци од изјавата-документ доставена од сведокот Арон Сири до Постојаниот поткомитет за истраги. Неговото сведочење во сенатот можете да го погледнете овде:

Тој го започна сведочењето со излагањето дека на почетокот на 2017 година, организацијата што ја претставувал (ICAN) барала научник кој би можел да спроведе студија за споредба на вакцинирани деца со невакцинирани деца. Извршниот директор на ICAN претходно се сретнал со д-р Маркус Зервос кој е раководител на одделот за заразни болести во „Henry Ford Health“, кој е огромен медицински центар со 33.000 членови и над 250 локации. Се сретнале со д-р Зервос во неговата канцеларија на почетокот на 2017 година за да го поттикнат да спроведе студија за споредба на вакцинирани со невакцинирани деца. Д-р Зервор прифатил.

Д-р Зервос ги вклучил своите колеги во спроведувањето на оваа студија користејќи ги здравствените податоци што веќе ги поседува „Henry Ford Health“, која годишно комуницира со милиони пациенти. Меѓу нив биле Лоис Ламерато, доктор на науки и Сјаочин (Ејми) Танг, доктор на науки. Д-р Ламерато е епидемиолог со над 250 објавени трудови и истакната личност во „Henry Ford Health“.

Тимот истражувачи биле мејнстрим, традиционални, остварени научници кои имаа ортодоксни ставови во врска со вакцините.

Студијата е завршена

На почетокот на 2020 година, Арон Сири добил копија од студијата. Таа ги покажала резултатите од анализата што ги споредува децата во „Henry Ford Health“ од раѓање па натаму кои немале изложеност (без вакцини) со оние кои биле изложени (една или повеќе вакцини).

Студијата на Хенри Форд покажала дека вакцинираните деца имале статистички значајно зголемена стапка на разни сериозни хронични заболувања. На пример, вакцинираните деца имале

• 3,03 пати поголема стапка на атопични заболувања (група на алергиски состојби);
• 4,29 пати поголема стапка на астма; 
• 7 пати повеќе акутни и хронични инфекции на уво;
• 5,53 пати поголема стапка на невроразвојни нарушувања,
   – што вклучувало 3,28 пати поголема стапка на застој во развојот и
   – 4,47 пати поголема стапка на говорни нарушувања;
• 5,96 пати поголема стапка на автоимуни заболувања.

Според Арон Сири, доколку оваа студија покажела дека вакцинираните деца се поздрави, тој не се сомнева дека брзо и лесно ќе била објавена. Не била поднесена за објавување токму затоа што нашла спротивен резултат.

Насловната страница на студија реализирана во Henry Ford Health

Како што се гледа од апстрактот на трудот приложен од Арон Сири, студијата изолирала 18 468 деца во медицинскиот систем Хенри Форд кои биле запишани во тој систем од раѓање. Ова значело дека податоците ги опфатиле сите медицински средби од раѓање до отпишување, вклучувајќи ги сите вакцини што ги примило секое дете и медицинските состојби за кои биле кодирани. Меѓу овие 18 468 деца, 1957 не биле изложени на вакцинација (што значи нула вакцини), а 16 511 примиле барем една вакцина за време на нивното запишување, со различни нивоа на изложеност.

Студијата започнала со следното објаснување:

“Истражувањата што се однесуваат на овие загрижености за безбедноста на вакцините можат да им помогнат на клиничарите во дискусиите со нивните пациенти и да послужат за уверување на родителите во целокупната безбедност на вакцинацијата.”

Оттука, наведената цел на студијата била да се исклучат вакцините како причина за „долгорочни негативни здравствени последици“ со цел „да се уверат родителите во целокупната безбедност на вакцинацијата“. Значи, намерата на студијата била да се намали двоумењето за вакцинација и, со тоа, да се зголеми прифаќањето на вакцинацијата.

Потоа објаснува дека користејќи ја огромната база на податоци со здравствени картони во овој медицински систем, студијата „ги евалуирала здравствените исходи на последователна кохорта деца родени помеѓу 2000 и 2016 и запишани во системот“.

Откако ги поделила вкупно 18 468 деца во две групи, изложена и неизложена група, студијата потоа ги пресметала „стапките на инциденца и количниците на стапките на инциденца (IRR, Incidence Rate Ratio), врз основа на статусот на изложеност пред да се развие состојбата“.

Иако очекувале да откријат дека вакцинираните деца се поздрави од, или барем исто толку здрави како, невакцинираните деца, наместо тоа го откриле следново:

„Севкупно, развојот на хронична здравствена состојба се јавуваше почесто кај групата изложена наспроти неизложената вакцинација... и беше почест кај оние изложени на вакцинација (IRR 2,48, CI 2,12-2,91).“

Детализирајќи ги специфичните медицински состојби, тие објасниле дека „е пронајдена статистички значајна поврзаност помеѓу вакцинацијата и инциденцата на астма, атопични и автоимуни заболувања и ментални здравствени и невроразвојни нарушувања, вклучувајќи доцнење во развојот и нарушување на говорот“. Зголемените ризици што ги откриле не биле мали:

• инфекција на увото (IRR 6,63, CI 5,73-7,66)
• хронична инфекција на увото (IRR 5,67, CI 4,37-7,37)
• анафилакса (IRR 8,88, CI 1,24-63,47)
• напад на астма или бронхоспазма (IRR 6,30, CI 3,85-10,31)“.

Ова е заклучокот на студијата:

Во оваа студија, откривме дека изложеноста на вакцина кај децата е поврзана со зголемен ризик од развој на хронично здравствено нарушување. Оваа поврзаност првенствено била предизвикана од зголемен ризик од астма, атопија, егзема, автоимуни заболувања и невроразвојни нарушувања. Ова сугерира дека кај одредени подложни деца, изложеноста на вакцинација може да ја зголеми веројатноста за развој на хронична здравствена состојба, особено за една од овие состојби. Нашите прелиминарни наоди не можат да докажат каузалност и бараат понатамошно истражување.

Студијата ги детализирала специфичните наоди за секоја хронична болест во две табели.

Инциденца на хронични здравствени состојби стратифицирани според статусот на изложеност на вакцина

Како што се гледа од оваа табела, за многу состојби, инциденцата и стапката кај вакцинираните се далеку поголеми отколку кај невакцинираните. За многу други, не можела да се пресмета стапка бидејќи, како што е дискутирано погоре, немало ниту еден случај на таа состојба кај невакцинираните – конкретно кај невакцинираните деца немало ниеден случај на мозочна дисфункција, дијабетес, ADHD, тешкотии во учењето, интелектуална попреченост и тикови, за разлика од стотици случаи меѓу вакцинираната група. Во десната колона, првиот број е IRR, количникот на стапките на инциденца, кој го покажува количникот на стапката кај вакцинираните и стапката кај невакцинираните деца. Ако IRR е под „1“, тоа одразува пониска стапка на таа хронична здравствена состојба кај вакцинираните. Ако IRR е над „1“, тоа одразува повисока стапка на таа хронична здравствена состојба кај вакцинираните. Десно од секој IRR број се прикажани уште два броја како опсег. Ова е интервалот на доверба (анг. Confidence Interval, CI), кој ја одразува веројатноста дека IRR е точен со обезбедување на веројатниот опсег, над и под IRR, во кој IRR веројатно ќе падне.

Коксова пропорционална анализа на регресија на опасностите за изложеност на вакцини и развој на хронична здравствена состојба

Потоа, студијата дава табела со коефициенти на ризик (анг. Hazard Ratio, HR) што се прилагодува за пол, раса, родилна тежина, респираторен дистрес при раѓање, траума при раѓање и предвремено породување. Овие прилагодувања се наменети да ги земат предвид потенцијалните нерамнотежи помеѓу вакцинираната и невакцинираната група за овие фактори. Како што ќе видите во оваа табела, која студијата ја наслови како „Коксова пропорционална анализа на регресија на ризиците за изложеност на вакцини и развој на хронична здравствена состојба“, прилагодените коефициенти на ризик се исто толку загрижувачки. Коефициентот на ризик, или HR, е сличен на IRR бидејќи го одразува зголемениот ризик (доколку е над 1) или намалениот ризик (доколку е под 1) од постоење на дадена состојба кај вакцинираните (во споредба со невакцинираните). Интервалот на доверба, или CI, до секој HR веќе го дискутиравме. А вредноста „P“ е уште еден начин да се одрази дали наодот е статистички значаен; вредноста на P на или под 0,05 значи дека наодот на HR е статистички значаен.

Каплан Мајерова крива: 10-годишно преживување без хронични заболувања преку изложеност на вакцина

Каплан Мајеровата крива е уште еден (последен) график од студијата што го покажува процентот на вакцинирани деца кои развиле барем еден хроничен здравствен проблем со текот на времето наспроти процентот на невакцинирани деца кои развиле барем еден хроничен здравствен проблем со текот на времето. Овој графикон одразува дека, по 10 години, 43% од вакцинираните деца немале дијагностицирана состојба, додека 83% од невакцинираните деца немале дијагностицирана состојба. Кажано обратно, по 10 години, кај 57% од вакцинираните деца била дијагностицирана една или повеќе хронични здравствени состојби, додека само кај 17% од невакцинираните деца била дијагностицирана една или повеќе хронични здравствени состојби. Со други зборови кажано – невакцинираните деца се три пати поздрави од вакцинираните (57/17 = 3,35)!?

Според неговото сведочење, од прегледувањето на овие табели и графикот треба да стане јасно зошто авторите на студијата и „Henry Ford Health“ не сакале да се објави оваа студија. За авторите, објавувањето на оваа студија би ги свртило практично сите луѓе и институции во нивниот свет против нив. Според Арон Сири, објавувањето на студијата би било правилно и храбро, но тоа би го разгорело гневот на речиси сите и на секоја институција што ја познаваат, на која се потпираат и ја сметаат за драга.

Нашиот коментар на оваа информација би го насочиле токму кон фактот дека наведената студија од сведочењето не е никаде објавена, па според тоа никој друг научник не може да ги провери методологијата и изложените резултати. Даденото оправдување за цензура или автоцензура не држи вода бидејќи постојат многу печатени и електронски медиуми кои би ја објавиле, еве ако никој не сака ние ќе ја објавиме во Емитер. Без објавување на студијата и сите релевантни податоци нејзините резултати и заклучоци се под сомнеж, независно од тоа што изјавите се дадени под заклетва.