На настанот, проф. д-р Миле Јованов, Претседател на Здружението на Информатичарите на Македонија, ја презентираше агендата за претстојната олимпијада и ја потенцираше долгогодишната посветеност на организацијата за промовирање на постигнувањето исклучителни резултати во областа на информатиката. Тој ја истакна улогата на БОИ во поттикнувањето на соработката меѓу балканските народи и инспирацијата на млади таленти во областа на технологијата и иновациите.  

„Горди сме што сме домаќини на 31. Издание на Балканската олимпијада по информатика. Додека се подготвуваме за почетокот на олимпијадата, сакам да потсетам на суштинската улога која ја имаат настаните како овој во обликувањето на новите ИТ кадри во регионот. БОИ 2024 е натпревар помеѓу новите генерации информатичари, но истовремено е и платформа во чии рамки младите умови се здружуваат, се запознаваат со различни култури, се дружат, се вмрежуваат и разменуваат искуства од сферата на информатиката и иновациите, инспирирајќи се меѓусебно и претставувајќи еден вид стимул едни за други. Со поттикнување на овој дух на соработка и конкуренција, ја негуваме следната генерација лидери во технологијата, што е од витално значење за континуираниот раст и развој на нашето општество. Чувствувам и лична сатисфакција кога гледам како Балканската иницијатива која стои зад организацијата на БОИ се подобрува секоја година од периодот кога јас претседавам со неа, а се повеќе земји кои го опкружуваат Балканот се заинтересирани да пристапат во иницијативата. Во последните неколку години ни се придружија Словенија, па Италија, а веќе три години интерес за приклучување покажува и Украина.

Во оваа прилика, би сакал да изразам благодарност до сите спонзори, поддржувачи и помагатели, чија поддршка го овозможи овој настан. Повикувам на поголема вклученост на компаниите и институциите во поддршка на ваквите иницијативи како Балканската олимпијада по информатика и на нашите олимпијци, за заедно да овозможиме посветла иднина за нашата младина и идна работна сила.“, истакна проф. д-р Јованов.

Како поддржувач и пријател на Балканската Олимпијада по Информатика, компанијата “Сорсикс “ (Sorsix), една од водечките ИТ компании во Македонија, додели ваучери за платена пракса за осуммината македонски учесници. Во своето обраќање, г-дин Далибор Фртуник, Извршен Директор на “Сорсикс“, ја потенцираше важноста на инволвираноста на приватниот сектор, во форма на општествено одговорен граѓанин и еднаков учесник во општеството, во поддршката на ваквите иницијативи кои ги оформуваат идните професионалци во технолошката индустрија.  

„Како компанија чии клучни вредности и суштина се базираат на технологијата и иновациите, “Сорсикс“ ја препознава огромната важност и вредност на иницијативите како Балканската олимпијада по информатика. Веруваме во инвестирање во иднината и токму затоа сметаме дека со поддршка на настани како БОИ 2024, активно придонесуваме во развојот на следната генерација на ИТ таленти. Сметам дека приватниот сектор има клучна улога во создавањето можности за напредување на младите таленти и како компанија која повеќе од 12 години работи и создава ИТ решенија од областа на здравството во Македонија, но и ширум светот, сериозно ја сфаќаме оваа одговорност. Со поддршка и инвестирање во овие брилијантни млади умови, помагаме во обликувањето на иднината на информатичката технологија. Обезбедувањето на едномесечна платена пракса во “Сорсикс“ за македонските учесници е наш начин да го негуваме нивниот потенцијал, а воедно и да го премостиме јазот помеѓу образованието и примената на знаењето во реалниот свет. Да се биде општествено одговорен и активен учесник во општеството за нас е токму ова -  активна поддршка на идните генерации и инвестирање во талентите кои верувам дека доколку продолжат со исто темпо, ќе го поттикнат напредокот во ИТ секторот во земјата.“ – изјави г-дин Далибор Фртуник.

Еден од македонските учесници, во име на Македонските олимпијци кои ќе се натпреваруваат во рамки на Балканската Олимпијада по Информатика оваа година, изрази благодарност до организаторот на Олимпијадата – ЗИМ и до “Сорсикс“, што го препознаа нивниот потенцијал и им овозможија простор за дополнителен развој и примена на наученото.

Редакцијата на ЕМИТЕР им посакува на македонските претставници успешно претставување на претходната олимпијада, а за домаќините-организатори настан што ќе се памети по гостопримливоста и беспрекорната изведба.

Балканската олимпијада по информатика е натпревар во програмирање за средношколци од регионот на југоисточна Европа. Домаќин на олимпијадата секоја година е различна земја, членка на БОИ иницијативата. На олимпијадата секоја држава има право да учествува со најмногу 4 (четири) ученици/ натпреварувачи кои претходно се бираат според постигнати највисоки државни резултати, а државата домаќин може да има 2 тима од по 4 (четири) натпреварувачи, односно најмногу 8 (осум). Земји учеснички во Балканската олимпијада се Македонија, Србија, Албанија, Грција, Бугарија, Романија, Словенија, Молдавија, Босна и Херцеговина, Кипар, Турција, Црна Гора и Италија. Дополнително, учество заземаат и учесници од други земји кои се поканети како гости на Олимпијадата, како Хрватска, Швајцарија, Полска, Украина, Саудиска Арабија. Овогодинешното, 31. издание на Балканската олимпијада по информатика, во организација на Здружението на Информатичари на Македонија, ќе се одржи во Охрид, Македонија, во период од 20 септември до 26 септември 2024 година.

За Здружение на Информатичарите на Македонија

Здружението на Информатичарите на Македонија е организација која се залага за развој и унапредување на информатиката и нејзина примена во сите аспекти на општественото делување. Клучните цели на Здружението вклучуваат заштита на правата и интересите на своите членови, унапредување на стручното знаење на членовите преку стручни собири, предавања и дискусии на одредена тема и подобрување на информатичкото образование. Здружението организира различни едукативни активности како семинари, курсеви, ИТ натпревари и тематски конференции, залагајќи се за подобри наставни програми по информатика во училиштата. Преку своите три доминантни сфери на делување - образование, индустрија и млади - Здружението соработува со Институциите, бизнис секторот и другите организации за да го поттикне развојот на информатиката во образованието и индустријата, истовремено подготвувајќи ги идните генерации за дигиталниот свет.

За “Сорсикс“

Основана во 2012 година, “Сорсикс“ е ИТ компанија посветена на поттикнување на иновации во сферата на здравството и здравствената грижа преку развој на најсовремени софтверски решенија. Со нивната иновативна платформа за е-здравје, “Пинга“, интегриран здравствен информативен систем кој го рационализира обезбедувањето и координацијата на здравствените услуги, компанијата направи револуција во здравството во Македонија, Србија и други земји ширум светот, елиминирајќи ги листите на чекање во рок од шест месеци и значително зголемувајќи ги капацитетите на здравствениот систем. Мисијата на “Сорсикс“ е да ги реши предизвиците за човековото здравје преку примена на ИТ решенија. Управувајќи со здравствените податоци на над 10 милиони пациенти и повеќе од 56 милиони записи годишно, “Пинга“ поддржува над 110.000 клинички ресурси и 55.000 дневни корисници низ 330 клинички центри во Австралија, Нов Зеланд и Европа. Нудејќи решенија како електронски здравствени досиеја, онлајн резервации и болнички информациски системи, “Пинга“ делува како сеопфатен „здравствен оперативен систем“ - замена за повеќе софтверски производи. Неодамна, компанијата “Сорсикс“ ја лансираше и апликацијата “Мое Здравје“, во чии рамки граѓаните на Република Македонија во секое време може да пристапат и да имаат увид до својот здравствен картон, претстојните закажани прегледи, како и добиените резултати.