Рубрика: Биологија
Светски ден на биолошката разновидност – вистини и митови биодиверзитетот
Објавено на 22.05.2024 - 14:15

Биодиверзитетот, извонредната разновидност на живиот свет што ја населува нашата планета, е клучно прашање за нашата иднина. По повод Светскиот ден на биолошката разновидност, во продолжение разгледуваме неколку вообичаени тврдења на оваа тема, со цел да разбереме што од тоа е добро основана вистина, а што мит што треба да се разоткрие и отфрли.

 

1. Биодиверзитетот се однесува само на разновидноста на култивираните растенија и животни

Неточно: Биолошката разновидност оди многу подалеку од земјоделството. Ги вклучува сите живи видови, од микроорганизмите до големите цицачи и нивните природни живеалишта. Земјоделската разновидност е само мал дел од една многу поголема слика.

 

2. Средините богати со биодиверзитет се постабилни

Точно: Како што досега покажале многу студии,ова значи дека екосистемите со поголема биолошка разновидност се поотпорни на нарушувања на животната средина и полесно закрепнуваат по настани како што се пожари или болести.

3. Биодиверзитетот е важен само за научниците

Неточно: Биодиверзитетот е основното нешто што придонесува за благосостојбата на секој од нас во секојдневниот живот. Биодиверзитетот е суштински услов кој е поврзан со достапноста на храна, чиста вода, чист воздух, лекови и градежни материјали. Понатаму, за различни заедници тој има и културна, естетска и духовна вредност.

 

4. Биодиверзитетот има „вредност“ и од економски аспект

Точно:  Биодиверзитетот е основен економски ресурс. Многу индустрии, како што се земјоделството, рибарството, шумарството и туризмот, зависат од биолошката разновидност. Понатаму, биодиверзитетот е извор на нови лекови и биотехнолошки производи.

 

5. Човечките активности само делумно влијаат на биолошката разновидност

Неточно: Човечките активности се главната причина за губење на биолошката разновидност на глобално ниво. Уништувањето на шумите, загадувањето, климатските промени и воведувањето на инвазивни видови ставаат во опасност безброј видови и цели екосистеми.

 

6. Видовите присутни на Земјата сега се претежно познати

Неточно: Се проценува дека на Земјата има некаде помеѓу 8 и 10 милиони различни видови, но ние знаеме само мал дел од нив! Има видови што допрва ги откриваме, а за жал и такви што можеби ќе исчезнат уште пред да дознаеме за нив.

 

7. Нашите напори за заштита на биолошката разновидност, за жал, се од мала корист

Неточно: Инвестирањето во акции за заштита на биодиверзитетот е секогаш добар избор, а во две третини од случаите тоа води до многу конкретни резултати. Ова е потврдено со истражувањето објавено во Science, кое сепак нагласува дека, за да се исполнат амбициозните глобални цели за зачувување на видовите, истите ефикасни интервенции треба да се следат со поголема посветеност.

Клучни зборови: