9.2.1923 – Роден е Норман Шамвеј

Норман Шамвеј (Norman Shumway) е американски лекар, хирург, првиот кој извршил успешна трансплантација на срце во САД. Голем  број пациенти во времето кога трансплантацијата на срце била сè уште мошне експериментална и несигурна процедура, не живееле многу долго по операциите. Поради ова, многумина од хирурзите се откажувле од оваа процедура и не сакале да извршуваат трансплантација на овој највитален од органите. Но, д-р Шамвеј продолжил да ја рафинира постапката и работел на намалување на отфрлањето и зголемување на безбедноста и долговечноста на пациентот. Првата успешна трансплантација била направена на 6 јануари 1968 година. Денес во светот се извршуваат околу 3000 трансплантации на срце во текот на годината, од кои најголемиот дел во САД. (Н.С.)

9.2.1996 – Создаден е елементот 112

Група германски нуклеарни научници од ГСИ најавуваат дека го создале елементот 112, унунбиум (ununbium). Елементот е создаден со помош на испукување јадра од цинк-70 кон олово. На крајот од процесот бил детектиран еден единствен атом на елементот Uub-278, кој мошне брзо се распаднал во Uub-277.

Во 2010 година елементот унубиум беше преименуван во копернициум, во чест на Никола Коперник. (Н.С.)

9.2.1945 – роден е Јошинори Осуми

Јошинори Осуми е јапонски цитолог (клеточен биолог), кој во 2016 година ја доби Нобеловата награда за медицина за откритијата во врска со механизамот на автофагија. Автофагијата е процес во којшто клетките ги деактивираат и ги уништуваат непотребните или нефункционални компоненти. Осуми ги идентификувал гените одговорни за автофагијата во клетките на квасецот. (Н.С.)

9.2.1950 – Создаден е елементот 98

Научниците од Универзитетот во Калифорнија, Беркли, во лабораториите ги синтетизираат првите атоми на елементот калифорниум. Елементот е добиен со бомбардирање на целта од куриум со високоенергетски алфа-честички. Во нивниот експеримент биле добиени 100 атоми калифорниум-245 со полуживот од 44 минути.(Н.С.)