“#ChallengerДома е мобилна апликација во Македонија која ќе ги потикнува граѓаните да ги почитуваат мерките, а ќе помогне на компаниите да се рестартираат од Ковид-19”, – порачуваат Теодора, Олга, Стефан и Митко. Тие се младите од стартап компанијата Challenger кои себеси си поставија предизвик апликацијата да ја лансираат што поскоро.
На кој принцип работи апликацијата? Како што е замислена таа го мотивира корисникот-поединец да остане дома, нудејќи му награди за секој час изминат во домот. Наградите, коишто се состојат од попусти и стикери од продавниците коишто ќе се вклучат во проектот.
“Епидемијата од Ковид-19 како тим не натера да размислуваме што корисно би креаирале за нашите граѓани и компании, да направиме сите заедно добро за заедницата. Токму така се роди идејата за новата апликација наречена #ChallengerДома, преку која граѓаните ќе ги мотивираме и поттикнеме да седат дома. Инаку, во оваа фаза би сакале да ги повикаме сите компании да се вклучат да бидат дел од апликацијата, се со цел сплотени да ја пребродиме економската криза. Ве уверуваме дека оваа апликација ќе е вин-вин за сите, така што очекуваме да биде прифатена како од граѓаните, така и од компаниите“, – велат од Challenger.
Апликацијата #ChallengerДома се појавува во вистински момент на пазарот. Ќе може да се инсталира на сите паметни мобилни телефони, а поддржана е од Фондот за иновации и технолошки развој.
