Логично на предвидувањата, малата група ентузијасти, со по некој од најблиските пријатели, како и пријателите од Клубот Мини (Морис) и Буба Клубот од Скопје, се сретнаа во центарот на Скопје, се паркираа на Скопското Кале за куса фото-сесија и на пропишаната дистанца извозеа почесен “круг“, кој всушност не беше круг, туку “отсечка“ во два правци долж булеварот Партизански Одреди, од зградата Тифани до кружниот тек на почетокот на Ѓорче Петров и назад.

Сообраќајот во саботното дождливо пладне беше прилично динамичен, па останатите учесници во сообраќајот беа почестени и изненадени од неочекуваната пријатна глетка  – кога 6 историски примероци на Пежо 404 продефилираа во одлична возна состојба пред нивните очи и радосна насмевка. Дури и ни препуштаа предност да поминеме пред нив, што е постапка во сообраќајот која сè поретко забележува како акт на добра волја и на галантно однесување.

Овој избор на убави фотографии, дело на Петар Маниќ (Пежо 404) и Ана Молкоска (Мини), ќе останат да сведочат дека и во моменти на големи искушенија, креативниот дух и творечкиот ентузијазам на човекот секогаш придонесуваат тој да ги надмине предизвиците, збогатен со скапоцено искуство и освестен за фокусот на вистинските и суштински вредности на животот. До тоа искуство полесно доаѓаме доколку сме имале можност да уживаме во убавината, елеганцијата, сигурноста, удобноста и во квалитетот на такви ретки дела на уметноста и технолоијата, каков е автомобилот Peugeot 404.

Активноста беше дел од подготовките за патувањето на неколку членови на Клубот од Скопје до Република Франција во посета на Музејот на Пежо во Сошо и назад до Скопје. Од клубот се надеваат дека ќе успшеат да обезбедат средства за покривање на трошоците за патувањето на барем 4 возила. Воедно при комуникацијата со слични клубови биле добиени сигнали дека на малиот конвој  сосема можно е попатно да му се придружат и пријателите на Пежо 404 од Србија, Хрватска и од Словенија, па на тој начин овој настан би стекнал и меѓународен карактер.