Веќе одамна не е тајна дека кучињата ги чувствуваат емоциите на луѓето со коишто живеат. Веројатно секој кој има или некогаш имал милениче дома може да ви раскаже најмалку една неверојатна приказна кога неговиот миленик му ги разубавил најтешките денови. Исто така речиси сите кои одговорно ги чуваат нивните миленичиња ќе ви кажат дека и тие ја чувствуваат болката на нивните миленичиња кога тие се болни или повредени. Сега едно ново истражување, што беше објавено минатата недела во Nature Scientific Reports, укажува на тоа дека ако сопственикот на песот е хронично под стрес, овој стрес може да се пренесе и на неговиот миленик.
Нивото на хормоните на стрес, каков што е кортизолот, на пример, се зголемува во телото на човекот додека тој е под стрес. Оваа состојба, како и кај сите цицачи, остава траен запис во влакната на косата за сите ситуации во коишто сте се чувствувале стресно. Записот на покачените нивоа кортизол во одреден период од животот многу јасно може да се прочита, слично на начинот на којшто може да се прочитаат климатските промени на планетата од примероците коишто се земаат од антарктичкиот мраз. Ова се должи на тоа што зголемената концентрација на кортизол во периоди на продолжен стрес кај цицачите директно влијае на брзината со којашто расте влакното од косата односно од крзното, забавувајќи го неговиот раст.
За да дојдат до појасна слика за нивото на стрес што во текот на повеќемесечен период во одредени моменти го чувствувале луѓето и нивните миленичиња, научниците ги испитале примероците на влакна собрани од крзното на 58 кучиња и од косата на нивните сопственици. Потоа од секој од сопствениците било побарано да пополнат прашалник за нивната здравствена и ментална благосостојба како и за однесувањето на нивните миленици. Единствената променлива којашто влијаела на нивото на стрес кај кучињата било нивото на стрес кај нивните сопственици, што укажува на тоа дека нашите миленичиња може да бидат мошне чувствителни на нашата невроза, па дури и да ја “соберат” истата.
Ова не значи дека луѓето кои патат од анксиозност и неврози не треба да имаат миленик. Како што пишува National Geographic во нивната сторија за ова истражување, Американската асоцијација за анксиозни нарушувања дури и препорачува на посвојување милениче како дел од терапијата на луѓето. Имено, повеќе научни истражувања досега докажале дека поседувањето миленик има далекусежни здравствени бенефити за нивните сопстеници, како што е намалување на крвниот притисок и подобро поднесување на стресните ситуации во животот.