Вакви малоумности не се некоја новост, но загрижувачки проблем е што еден македонски весник (од вкупно четирите постоечки!) ова го објави како засебна, нормална вест и го објави тој видео материјал (види слика подолу) и со тоа му даде кредибилитет на една гнасна лага! А токму тој дневен весник се помодре самиот од удирање во гради дека е најгласен во критиките на праксата на ширење лажни информации (fake news)! Како да им се објасни на овие “професионални новинари“ дека основно новинарско начело е прво да се провери изворот на информацијата. А изворот на информацијата наводно е Викиликс. Е, па?

За разлика од тие “професионални новинари“, јас отидов на веб-страницата на Викиликс. А таму – ни трага, ни глас од тој видео материјал!!! Значи, видеото со наводните докази дека астронаутите воошто не слетале на Месечината всушност не потекнува од Викиликс! Сега е јасно дека тој што го измонтирал тој видео материјал излажал дека Викиликс е изворот на тоа видео, па само го залепил логото од Викиликс во горниот агол од видеото, во обид да му даде тежина и веродостојност на својот фалсификат.

А самото видео е толку аматерски и наивно направено, што смрди на фалсификат уште пред да заврши првата минута. Инаку, видеото е долго 11 минути и 44 секунди, но има и верзии од околу 15 минути дополнети со видео материјал од некое “Flat Earth Hungary“ (аман веќе од овие “рамноземјани“!). Видеото е хаотичен колаж од документарни снимки од екипа која прави некаков филм (има камери, рефлектори, луѓе се сноваат наоколу...) и тоа се случува на Земјата, но тоа е измешано со видеоснимки на астронаутите на Месечината, но и документарни снимки на Земјата. Но, никаде нема да ги видите истовремено астронаутите со кратерите околу нив и луѓето со камерите и рефлекторите!

Тоа оди вака:

0:40 (нула минути, 40 секунди од видеото) – кратка реална снимка од астронаутите на Месечината, тие се движат еден кон друг, малку подзастануваат, а токму во тој момент во позадина оди намонтиран глас “Now move“ и астронаутите продолжуваат да се движат. Да, бе...

1:08 – во ист стил, замрзнато видео на астронаут на Месечината, се слуша намонтиран глас “Ready... and... action!“ и се пушта видеото да тече. А бе ајде...

1:45 – реална снимка на возење на астронаут со “месечевиот ровер“ на Месечината, но притоа има звук како трактор да брчи! Го претераа – месечевиот ровер се движи со бесшумни електрични мотори!

И така натаму...

Заклучок: вообичаени глупости на интернет, но и голем срам за македонското новинарство!

Видеото: