Еднаш мораше и тоа да се случи – некој паметен да најде посериозна употреба на оние играчки што левитираат, во форма на глобус, Death Star, Space Ship, итн. Кај тие играчки поентата е само во стабилното лебдење на некој мал и впечатлив предмет, но кај грамофонот MAG^–LEV дискот (заедно со винилната плоча) не само што лебди, туку и ротира со константна брзина од 33 1/3  или 45 вртежи во минута. Кај класичните грамофони голем проблем е да се намали механичкото пренесување на вибрациите од моторот и околината врз дискот и тој проблем досега само се ублажувал со употреба на разни конвенционални методи – совршено исполиран врв на осовина на дискот заедно со нејзиното лежиште и специјални масла за подмачкување (за минимално триење), масивен диск (за жироскопски ефект и инертност на надворешни вибрации), пренос од ротацијата на осовината на моторот до дискот преку гумен ремен (за дампирање на вибрациите), па дури и перманенти магнети за левитирање на дискот (но при што осовината на дискот повторно е во контакт со лежиштето). Кај грамофонот MAG^–LEV дискот потполно е одвоен од остатокот од грамофонот и навистина левитира. Трикот е во употребата на променливо магнетно поле, кое не само што го држи дискот подигнат, туку и го ротира со константа брзина. На тој начин, сите можни непожелни вибрации потполно се елиминирани – најпосле е створен совршениот грамофон! Овој грамофон е дело на група словенечки експерти од разни области, како дизајнери, електроиженери и аудиофили, најмногу од иновативните фирми DesnaHemisfera и Topsol, но и независни експерти. Дизајнот и конструкцијата ги заслужуваат сите пофалби, почнувајќи од духовитото решение со логото MAG^–LEV кадешто средната цртичка („тире“) левитира погоре, преку добрите дизајнерски решенија на телото на грамофонот, дисплејот и илуминацијата под дискот, употребата на солидната грамофонска рачка Pro-Ject 8.6 и вообичаениот  добар избор на интегрираните решенија со грамофонската глава Ortofon OM5 (која може да се замени со некоја подобра и поскапа во секое време), па до совршено осмислените решенија за потпирање на дискот по евентуален прекин на напојувањето, преку интерен UPS уред.

Предфинансирањето на MAG^–LEV грамофонот беше извршено преку платформите Kickstarter и Indiegogo, кадешто среќниците што партиципираа ќе ги добијат своите MAG^–LEV грамофони за 790, односно 1090 американски долари. Нормалната малородажна цена ќе биде околу 1500 долари.